2 TIMOTEO 4

1Ninkuragira nkutaireho Ruhanga na Yesu Kirisito aliramura abalikurora n'abafire, ninkutaho n'okugarukakwe n'engomaye: 2Orange ekigambo, obe mwangu omu kirumo n'orwo kitali kirumo, ohane, otaise, kandi otemu abantu ekihika, mara oyegumisilize n'okwegesa obutalemwa. 3Obukiro bulija orwo abantu batalikunda bilikwegesibwa eby'amazima. Amatwi gabo galyagayaga. Balihiga abeegesa ababo abatali bake abalibagambira ebyo bonene balikwenda. 4Balisigiilira okuhulira amazima n'ebitangazo bahwere omu bigano. 5Kyonkai iwe oikare ogumire, oyemere obushasi, okore omulimo gw'omurangi w'evangeli, ogobesheleze kurungi oburagirwa bwawe. 6Inye n'orwo ndaba ndi w'okutambwa ekitambo nayetekatekire; akaanya kange kali haihi, naija kufa. 7Ndashaine endashana nungi, okwiruka kwange nkumazire, mara kandi ngumire omu kwesiga. 8Kityo natekatekeirwe orukinga rw'obugorogoki orwo Omukama, omuramuzi omugorogoki, alintunga aha kiro kiliinya eky'aliija, mara taliruntunga nyenkai, shana alirutunga na bona abatuura baramiliize k'agaruka. 9Okore okw'olikushobora ongobe bwangu. 10Ahakuba Dema agondize ensi egi elikwija kuhwaho, yansiga yagya Tesalonika. Kereshensi ogwo agiire Galasia, kandi Tito yagya Dalumasia. 11Luka wenkai niwe tuli hamoi. Ompiigire Mariko omundetere, kuba nagasha muno, nanjuna. 12Tikiko ogwo mutumire Efeso. 13Orwo oragya kwija onyizire n'ebebo eyo nasigiire Karipo omu kigo kya Toroa. Oshube ondetere n'ebitabo, omuno muno ondetere ebitabo eby'empu! 14Alekisanda omuhesi w'omulinga ogwo akankora kubi muno; Omukama alimurongora ebikorwabye ebyo. 15Na iwe oramwelinda, ahakuba ebyo twayegesize akabyanga. 16Orwo nabandize kwerabira taliho muntu yagweleire wange; bona bakannagirana. Omukama alikasinga atalibakwata mushango! 17Kyonkai Omukama akandabira, yantunga n'amani g'okuranga evangeli ntalikutina, Abanyamahanga bashobore kuhulira evangeli egyo. Kityo akandokora omu kanwa k'entare. 18Nikwo alinyihya omu kabi kona kona, akashuba akandokora akantaahya omu bukamabwe obw'omw'iguru. Ekitiinwa kibe kya wenene eira lyona. Amina. 19Onshulire Purisika na Akila n'eka ya Onesiforo. 20Erasito ogwo akasigara Korinto; Tirofimo nkamusiga Mileto arwaire. 21Okore okwo olikushobora kwija ekirumo ky'embeho kitakabandize. Eubulo nakukeisa hamoi na Pudensi, Linusi, Kalaudio na barumuna baitu bona. 22Omukama abe naiwe. Omugisha gwa Ruhanga gube nainywe.

will be added

X\