2 TIMOTEO 3

1Oramanya okwo omu biro by'amaheleruka halibaho amakiro g'enaku. 2Abantu balyeyenda, bagonze empiya, bagire eikuru, eisinini, babe njumangani, tibalihulira bazaire, baburwe esiimi, babe bantu babi, 3bekoze ebitali bya buntu, kutonganwaho bakanga kugarulira, babeiyelerangane, tibalyebalira, babe nshanshame, banobe akarungi, 4baliba ndyalya, barakoraga ebintu nibabiita, eitulikizi libaite, baligonza ebinuzi by'ensi kushaaga okugonza Ruhanga, 5balimanya edini kyonkai bange eby'eyegesa. Abantu nk'abo obelinde. 6Enshonga omuli bonene abo halimu abalikushoobera omu maju ga banu, bakahamba abakazi abalikworoba omutima, abafakare ab'emize elikukiza amaani, 7abakazi abalikuhuliliza buli mwegesa, kyonkai agamanya amazima tibainago. 8Nk'okwo na Yane na Yambure bahakanisize Musa, nikwo n'abantu aba balikwanga amazima; bantu abafire amagezi, n'okwikiliza kwabo kw'obugobya. 9Kandi tibalikwija kugoba harai muno, kuba buli omoi naija kubona okwo bali bafera nka Yane na Yambure. 10Mbwenu iwe oboine kurungi emyegesheze yange, emigilire yange, ekyo nyitanira omu burora bwange, okwesiga kwange, okwegumisiliza kwange, engonzi zange, okutatantalikwa kwange, 11okugingizibwa kwange, obushasi bwange, agambaireho Antiokia, Ikonio na Lisitira, n'okugingizibwa okwo nayemeire. Kyonkai Omukama akanyihura kurungi nabirabamu byona. 12Omu mazima bona abalikugonza Ruhanga omu burora bwabo bajwangaine na Yesu Kirisito baragingizibwaga, 13kandi abantu ababi, engobya, barabaga babi kushaagaho, barabeiyaga banu, kandi na bonene barabeiywaga. 14Kyonkai iwe ogendelere kukwata ebyo wamanyire mara okaikiliza limoi limoi, nomanya owo wabyegeireho, 15n'okwo kwema buto bwawe otura nomanya Ebihandiko Bitakatifu ebilikukushoboza kurokoka aha rw'okwesiga kwawe ojwangaine na Yesu Kirisito. 16Ebihandiiko Bitakatifu byona bikakyanurwa Ruhanga, mara nibigasha aha kwegesa, n'aha kuhana banu, kubahabura, n'okubegesa okuba bagorogoki, 17omuntu wa Ruhanga ashobore kuba mugorogoki, ayetegekire kukora buli mulimo ogurungi.

will be added

X\