2 TIMOTEO 1

1Inye ndi Paulo, owo Ruhanga yayenzire kamba ntumwa ya Yesu Kirisito kuranga oburora obwo yatushuubiize obwo twinabwo omu kujwangana na Yesu Kirisito. 2Ninkuhandikira iwe Timotheo, omwana wange omugonzibwa. Ruhanga Isheichwe n'Omukama waitu Yesu Kirisito basinge bakutunge omugisha n'emilembe, mara bakuganyire. 3Buli kaanya orwo ndikukwijuka omu nshara zange, ninsiima Ruhanga owo nkolera n'omutima gwezire, nk'okwo batat'enkuru bagiraga. 4Orwo ndikwijuka okulira kwawe nkugilira orushusho kiro na mushana, mbone kushemelerwa muno. 5Okwesiga kwawe okw'amazima ninkwijuka, okwesiga okwo nyokw'enkuru Loisi na nyoko Yunisi babaire bainakwo obubere, na mbwenu nimanyira kimoi okwo okwesiga okwo nikwo oinakwo. 6Nikyo ndikukwijukiza kwinegeza amatungwa ga Ruhanga ag'oinago, ago watungirwe orwo nakutaireho emikono. 7Ruhanga tiyatutungire mutima gwa butini. Akatutunga omutima ogw'amani n'engonzi n'okwelinda. 8Ahonu otalikwatwa nshoni kuba mujulizi wa Mukama waitu, handiki inye omufungwawe. Ekiliho oshasire evangeli, orwo Ruhanga akutungire amani g'okugishasira. 9Akaturokora yashuba yatweta katuba bantube, tutasaine aha rwabikorwa byaitu, shana kuba wenene akakigendelera atyo, n'aha rw'ekisha ekyo yatutungire omuli Yesu Kirisito amakiro gatakabaireho. 10Mbwenu ekisha ekyo tukakishurulirwa okwija kw'Omurokozi waitu Yesu Kirisito; ayachwire orufu, akatutunga oburora obutalihwaho omu mani g'evangeli. 11Nobona inye nkarondwa aha rw'evangeli egi, naba murangi wayo, naba ntumwa yayo mara mwegesa wayo, 12mara niyo nshonga nimbona enaku ezi. Kyonkai tindikukwatwa nshoni, aha rw'okuba owo naikiliize nimumanya, mara nimanyira kimoi okwo alikushobora kulinda kurungi ebyo yankwasize kulemwa kuhika aha kiro eky'aliiziraho. 13Ebigambo by'amazima ebyo nakwegesize obikwate geigeigei, nibwo bulebero obw'orahondera, oikare n'okwesiga n'engonzi ebyo ichwe twinabyo tujwangaine na Yesu Kirisito. 14Amazima ago wabikisiibwe ogalinde omu mani ga Mwoyo Mutakatifu asingiire omuli ichwe. 15Nomanya okwo aba Asia bona bampindukire, omuli abo ni Figelo na Herimogene. 16Omukama asinge abonekere eka ya Onesiforo, enshonga emirundi nyingi yampaga ebyera; tiyankwatiirwe nshoni aha rw'okubona ndi mufungwa. 17Orwo wenene yagobire Roma akampiiga n'ekihika mara yambona. 18Omukama alikasinga amubonekere aha kiro ky'aliija. Kandi na iwe nomanya kurungi ebyo yankoleire omuli Efeso.

will be added

X\