2 ABATESALONIKA 3

1Eky'enzindo barumuna bange, mutushabire ekigambo ky'Omukama kirahuke kurandilira, kigire n'ekitinwa nk'okwo kyarandiliire n'okutinwa omuli inywe. 2Kandi naichwe mutushabire tukire aha bantu babi abanyarwango, kuba ti bantu bona abalikwikiliza. 3Kyonkai Omukama aba mwesigwa. Arabagumisa mara abaihure aha mubi. 4Nitwesiga Omukama okwo arabajuna, kandi nitumanya okwo ebyo twabaragiire mulikubikora mara mugendelere mutyo. 5Omukama asinge abahe emitima y'okugonza Ruhanga n'okuguma ahali Kirisito. 6Mbwenu barumuna baitu, nitubaragira omw'ibara ly'Omukama waitu Yesu Kirisito, kweshorora na kaishe mukirisito omunafu, atalikukwata muhelejanyio ogwo twabahaire. 7Inywe nywenene nimumanya okwo muragiirwe kuturondora. Orwo twabaire tuli hamoi nainywe titwanafaraga. 8Titwaliire mukate gwa muntu tutagushashwire. Tukafa twayosha kiro na mushana, tutaija tukaba rusampekire ahali wena wena omuli inywe. 9Tikwo kugir'oti tukaba tutasaine kamutuliisa. Tukagira tutyo kubaha obulebero obwo murahondera. 10Aha rw'enshonga n'orwo twabaire tuli bamoi nainywe, tukabaragira tuti: K'omuntu araba atakozire milimo, atalya. 11Nobona twahuliire okwo abandi omuli inywe balikunafara, bali aho kushai, tibalikukora milimo. 12Abantu nk'aba nitubaragira mara nitubashaba tubataireho Omukama Yesu Kirisito bakore emilimo yabo omu buchulezi mara behigire ebirabatunga. 13Barumuna bange, okukora kurungi kutabaira. 14K'omuntu wena wena alikwanga kuhulira ebyo tulikugamba omu barua egi, ogwo muramwekomya mara mumuleke aije ashonare. 15Mutamubona nka mubisha, ekiliho mumuhane bundi murumuna wanyu. 16Omukama w'emilembe wenene asinge abatunge emilembe ebiro byona mara omu ngeli yona yona. Abe nainywe inywena. 17Inye Paulo, ebishuuro ebi n'inye ndikubyehandikira. Aka niko kabonero ka buli barua yange, niyo mihandikire yange. 18Omugisha gw'Omukama waitu Yesu Kirisito gube nainywe inywena.

will be added

X\