1 Inye Paulo, Silivano na Timotheo, nituhandikira ab'enteko y'Abatesalonika tujwangaine na Ruhanga Isheichwe n'Omukama waitu Yesu Kirisito. 2 Ruhanga Isheichwe n'Omukama Yesu Kirisito babatunge omugisha n'emilembe. 3 Barumuna bange nituragirwa kubasiimira Ruhanga buli kanya, nk'okwo kisaine, nimweyongera muno omu kwesiga, mara kandi buli omoi nayeyongera kugonza mutahiwe. 4 Kityo nitubebuga omu nteko za Ruhanga kubona okwo mugumire mara mwaikara n'okwesiga kwanyu omu kugingizibwa kwanyu n'omu naku zanyu zona mara nimubyemera. 5 Aka kabonero okwo eiramu lya Ruhanga ly'amazima mara ekyo nikyo kilibasanisa obukamabwe obwo mulikushasira. 6 Ruhanga nabona okwo kisaine kubonabonyia abalikubabonesa enaku, 7 kandi inywe abalikushasha abatunge hamoi naichwe emilembe orwo Omukama Yesu aliruga omw'iguru n'abamalaikabe ab'amani omu ndimi z'omuliro. 8 Abamalaika abo balibonabonyia abantu abatamanya Ruhanga, abatahulira vangeli y'Omukama waitu Yesu. 9 Balishasha eirai lyona tibalirokoka, tibalibona na buso bwa Mukama, n'ekitinwakye eky'amani tibalikitungwa, 10 orwo alija kiro kilinya abatakatifube kumuha ekitinwa, abakamwesigire bona bamutangaliire, kuba ebyo twabagambiire mukabiikiliza. 11 Ebi nibyo twikara nitubashabira kamubona. Nitushaba Ruhanga waitu asinge abasaanise oburora obwo yabeteire. Omu bushoborabwe asinge agobesheleze emigendelero yanyu y'okukora ebili birungi kandi n'omulimo gwanyu gw'okwesiga nagwo agugobesheleze. 12 Kityo eibara ly'Omukama waitu Yesu Kirisito libone kuhaisilizibwa omuli inywe, nainywe muhaisilizibwe omuli wenene kuhondera ekisha kya Ruhanga waitu n'Omukama Yesu Kirisito.
