2 PETERO 2

1Omu bantu habagamu abarangi b'ebishuba, nk'okwo nainywe omuli inywe halikwija kubamu abegesa b'ebishuba, abalikwija kubatahyamu okwegesa okuhabire mutamanyire kukabaita, nangu betonge na Mukama wabo ayabachungwire, beletere okusilika omu kibwangu. 2Bangi baraikara omu by'obujanga, mara bonene abo barajumisa Omuhanda gw'Amazima. 3Aha rw'enshonga y'omururu barabagambira ebishuba babone kubaihyaho amagoba. Omuraamo gwabo ogwa karai tiguligwayo, kandi tibaliburwa kusilika. 4Abamalaika abafakaire, Ruhanga tiyabaganyiire. Akabanaga omu muliro ogutalihwaho, yabakomerana omu biina by'omwilima, kwikara omwo balindiliire kuramurwa. 5Ensi ey'obunyakarai nayo tiyagiganyiire, shana akahungya Noa ayabaire ali mugorogoki wa mbere n'abantu abandi mushanju, orwo yalesire omutunga omu nsi kwita abafakare. 6Ebigo bya Sodoma na Gomora akabyokya, yabaita yabamaramu, baba bulebero bw'abalifakara ahanyuma. 7Akakiza Loti omugorogoki, ayabaire yashobeirwe aha rw'emichwo mibi y'abasiyani 8(enshonga Loti ogu omugorogoki akaba abatwiremu nabona mara nahulira ebyo bakoraga, amafu gabo gamushasa buli kiro aha rw'obugorogokibwe). 9Ahonu Omukama namanya emirokolere eyo ararokora abamutina akabaihya omu biyengo, kandi abatali bagorogoki akababonabonyia kuhika aha kiro ky'eiramu, 10nangu obungi bwa muno balinya abatwarwa obunyama bakagaya abatwazi. 11Kandi okwo abamalaika, balikaba baina amani n'obushobora kubashaaga, tibaramura begesa aba omu maisho ga Ruhanga, n'okubajuma tibabajuma. 12Bonene bali aho nibashusha ebigunju ebitagira magezi, ebitondwa ebilikutwarwa obuhangwa kushai, bizalirwa okutegwa n'okwitwa. Nibajamya ebyo batalikumanya; baleke balifa nk'ebigunju ebyo, 13enaku ezo babonesize banu nabo nizo balibona. Nibabona kili ky'ebyera omushana gwona kusiiba omu mayaga. Bantu abaina akamosho n'akamogo n'orwo mulikusiiba nabo omu mayaga. 14Obusiyani bubaijwire omu maisho, kandi n'entambara tizilikubaira. Niboohya abaina emitima etagumire, kandi bakamanyiira omururu. Bakaraamwa! 15Basigire omuhanda bahaba. Bahondeire omuhanda gwa Balaamu eya Beori ayabonaga amafu gainamu amagoba, 16kyonkai gakamurugirwamu akabi. Endogobe etagamba ekagamba nk'omuntu, eiraru ly'omurangi yalitera aha mutwe. 17Abegesa aba b'ebishuba nibashusha enchuro zitaina maizi n'oruho oruhuutwa omuyaga. Balindiliire okunagwa omu mwilima elindindi. 18Bagambira eiguru ebigambo by'okwetutumura ebitaina mugasho, boohya abantu ababa bairukire abatuura bagwire, nibabalembesa amairu g'obunyama. 19Babashuubiza obwegeleere, kandi okwo bonene bairu b'obujunde; manyasi omuntu aba mwiru w'ayamusingire. 20Abantu abashangwa bakizire aha bihagaro by'ensi aha rw'okumanya Omukama mara Omurokozi waitu Yesu Kirisito, kabashuba kwetahya omu bihagaro ebyo, baija babikwatiramu mara bibakiza amani, ahonu baba kubi kushaaga okwo babaire bali orwa mbere. 21Kyakubaire kirungi kushaaga ahali bonene kabatakumanyire muhanda gwa kubahindura bagorogoki, kushaaga okushangwa bagumanyire bakanagaho omuhango ogutakatifu ogwo bahairwe. 22Babaire nk'okwo omugani gulikugamba amazima, guti, «Embwa eyegarukana entanaki yayo, n'empunu k'emara kwogibwa eshuba eyekurunga omu byondo.»

will be added

X\