2 PETERO 1

1Inye Simoni Petero, omwiru mara entumwa ya Yesu Kirisito, nimpandikira abaina okwikiliza nk'okwaitu okutalikuyuga omu kurondora Ruhanga waitu kandi Omurokozi waitu Yesu Kirisito. 2Ekisha n'emilembe byeyongere omuli inywe omu kumanya Ruhanga na Yesu Omukama waitu. 3Ruhanga, amanige nka Ruhanga gakatutunga buli kamoi kona tushobore kugir'oburora n'omutima gw'okumugonza orwo twamazire kumanya Yesu Kirisito ayatwesire katugira ekitinwa ekihango muno nk'ekya wenene. 4Omuli ebyo akatushuubiza ebirungi, mara ebirungi nyakabara eby'eiguzi lihango muno. Omu kuhaba ebyo mushobore kurondora Ruhanga, nimwelinda buli ntambara omu nsi omu ezilikuzarukana omu bunyama. 5Aha rw'enshonga egyo mutemu amani gangi, aha rw'okwesiga kwanyu mugire entwaza ezishemeire, entwaza ezo zibashoboze okumanya Ruhanga. 6Kamuramanya Ruhanga mwagira okwebalira, okwebalira kubagobye aha kutayuga, okutayuga kubashoboze okugonza Ruhanga. 7Kamuragonza Ruhanga muragonzangana bundi barumuna, mara aho muraguma omu ngonzi. 8Kamuragira engesho ezo mara zikeyongera kugira amani omuli inywe, zirabashoboza kukora ebigoshokire, mwije mubone kumanya kurungi Omukama waitu Yesu Kirisito. 9Kaishe muntu wena ataina ngesho ezi ogwo mpume mara taina gabona harai, kandi yayebirwe okwo yagaruliirwe entambaraze eza karai. 10Kityo barumuna bange, muteho amani agashaagireho kuguma omu mweto gwanyu ogwo mwaronkeirwe, aha r'okuba kamuragira mutyo timuligwa n'akati. 11Aho Ruhanga alibasingira mutahe omu bukama bw'eirai lyona obw'Omukama waitu mara Omurokozi Yesu Kirisito. 12Nikyo nyendera kubaijukya obutosha ebigambo ebi, n'orwo muraba nimubimanya n'amazima ago mulikumanya mwagagumireho. 13Nintekeleza nti, orwo nkyali omw'ihema eli, mbaijukye mbatengatengyemu. 14Kuba nimanya okwo eihema lyange nkwatiliire kulirugamu, nikwo Omukama Yesu Kirisito anyolekire. 15Ndalenga okwo ndikushobora kamushobora kwijuka ebigambo ebi n'orwo ndaba nagenzire. 16Tukabamanyisa okwo Omukama waitu Yesu Kirisito aba w'amani n'okwo aligaruka. Tikugir'oti tukaba nitubaganira ebigano by'okuhilimya, shana ichwe chwenene tukebonera ekitinwakye eky'obukama. 17Nobona Ruhanga Isheichwe akamutunga ekitinwa n'obukuru, n'eiraka lyamugobire omu kitinwa ekilikukira byona, niligamba liti, «Ogu niwe Mwana wange omugonzibwa owo nshemelerwa muno.» 18Eiraka eli tukalihulira niliruga omw'iguru, kuba tukashangwa aha ibanga litakatifu. 19Kityo eky'abarangi bagambire nitukigumaho. Nainywe muraba mukozirege kamurakyetaho, manyasi nikishusha etara elikwaka omu mwilima, kuhika orw'obwire bulitaishukana n'enyanyinyi y'obwankya ekaaka omu mitima yanyu. 20Mubanze mumanye ekigambo eki: Okwo hataliho kigambo kya murangi omu Bihandiko Bitakatifu eky'omuntu yakufa yashoborora okwo wenene yayenda. 21Eby'abarangi barangire tibyayemaga muli bonene kushai. Ebyo bagambaga byarugaga ahali Ruhanga nibasindikwa Mwoyo Mutakatifu.

will be added

X\