2 ABAKORINTO 9

1Aha kujuna abakirisito n'orwo nakuba ntabahandikire bishaagireho. 2Nimanya okwo omulimo ogwo mugutaireho omutima; ekyo nikyo kimpa okubebuga aha Bamasedonia ningamba okwo aba Akaya omulimo bakagutaho omutima kwema mwaka oguhoire, mara bangi muno omuli abo ekihika kyanyu kibatairemu amani. 3Kyonkai kantweke barumuna baitu, kitaija kikazoka okubebuga kwange aha mulimo ogu kwa bushai, kandi na inywe aho mushangwe mutaire omutima aha mulimo ogu, nk'okwo nagambire okwo muragutaho omutima; 4Abamasedoni bataija bakaija nanye bakashanga omulimo ogu mutagutaireho kihika, ichwe tukashonara aha rw'okubesiga tutyo, kandi tukaba tutakibebuga rundi. 5Kityo mboine nikigasha ntemu barumuna baitu ekihika banyebembere okwo, batekateke eshumbusho egyo eyo mwaragaine, etaija ekazoka yagirwa rwamani, ezoke eli shumbusho y'obweyendezi. 6Ekyo ndikugamba niky'eki: Ayabiba bike aligesha bike, n'ayabiba bingi aligesha bingi. 7Buli muntu naragirwa kukora okwo ayetegekire: Atasindara, kandi butaba bukakwa. Ruhanga agonza ayaha nashemelerwa. 8Ruhanga ogwo nashobora kubatunga omugisha gungi ogwa buli ngeli, buli kanya mushobore kugira ebibamazire, kandi n'abandi mubone kubajunisa bingi eby'okukoza emilimo yona emirungi. 9Nk'okwo kyakahandikirwe kiti; «Abajege abatunga bingi, ekishakye ky'eirai lyona.» 10Wenene atunga omubibi embibo n'omukate gw'okulya, n'iwe arabaha obwihyo bungi mara akabongera erongoro aha rw'ekisha kyanyu. 11Ekisha kyanyu kingi kilibabonesa bingi omuli buli kantu, aho na Ruhanga aije asiimwe aha rw'ekisha kyaitu ekyo. 12Kuba omulimo ogu ogwo mulikukora tigulikwija kubonesa bakirisito byo balikwetaga kwonkai, nawe nigwija kusindika abantu bangi kusiima Ruhanga. 13Okwo eikora eli lilikuzoka, nimwija kuhaisa Ruhanga ekitinwa aha rw'omuhuliro gwanyu orwo mulikwebuga evangeli ya Kirisito, n'aha rw'ekisha ekyo mulikubagilira omu kubajuna n'okujuna abantu abandi bona. 14Kandi bonene abo baraikara babagiliire orushusho, mara bate nibabashabira aha rw'ekisha kingi ekyo Ruhanga yabatungire inywena. 15Ruhanga nakasinge aha rw'amatungwage aga agatali ga kugambwa.

will be added

X\