2 ABAKORINTO 8

1Barumuna bange, nitugonza kubamanyisa ekisha kya Ruhanga ekyo enteko za Masedonia zatungirwe. 2Bakalengwa omu biyengo bingi ebyo barabiremu; kyonkai bakashemelerwa muno, baba bafura ebishobeize, bajuna banu, n'orwo kaziro bali banaku muno. 3Mbagambire amazima, bakagira ebintu bingi okwo babaire nibashobora, nangu n'okushagaho. Bakeyendera bonene 4batutagiliza na bonene kujuna abantu ba Ruhanga omuli Buyahudi. 5Bakagira kushaaga ebyo twabaire nitushuubira: Bakehayo, bakabanza bayehayo: Ahali Mukama, bashuba bayehayo ahali ichwe nk'okwo Ruhanga yabaire nayenda. 6Aha rw'ekyo tukatagiliza Tito k'amaliliza omuli inywe omulimo ogu gw'engonzi nk'okwo yakagubandize. 7Muli batungi omuli byona ebyo mwinabyo: Omu kwesiga, omu bigambo, omu bumanyi, omu bwegumisiliza obwa buli ngeli, n'omu ngonzi ezo mulikutugonza. Kityo mube nikwo mugira n'obufura omu mulimo ogu gw'engonzi. 8Omu kugamba ntyo tindikubaragira. Ningonza kuboleka ekihika eky'abandi bainakyo omu kujuna banu, mbone kumanya engonzi zanyu zina mazimaki. 9Nimumanya Omukama waitu Yesu Kirisito eky'ekisha kyamukolize: Wenene akaba ali mutungi, kyonkai yayehindura munaku kubarokora, mubone kuba batungi aha rwa wenene kwehindura munaku. 10Okwo bili, inye nimbategekera nti: Nikigasha kushaaga kamwakugobesheleza eikora elyo mwamara omwaka gwona mubandize. Ninywe mwabaire ba mbere kuralira ekigambo ekyo mara mukakikora. 11Mbwenu aho ekigambo ekyo mukimare. Mutemu ekihika kukimara nk'okwo mwakakiraliire: Ebyo mwinabyo mubigire mwaha. 12Kamuraba nimwenda kubigira, Ruhanga arasiima egabo zanyu ezo, nabona ebyo mwinabyo mara nimushobora kubigira, ebyo mutainabyo ebyo tabiliho. 13Inywe mutaba n'inywe musikilirwa, abandi kuba nirwo banguhirwa; chei, turabe omu bwiganwa n'amazima. 14Ebyo muraba mwinabyo mutalikubyetaga bijune abetaage, nabo orwo baraba baina ebyo batalikwetaga, bajune inywe orwo muraba muli betaage, kityo habeho obwiganwa. 15Nk'okwo kyahandikirwe kiti, «Ayashombokize bingi tiyashagwire, n'ayashombokize bike tiyalebeleirwe.» 16Omukama nakasinge alikutamu Tito ekihika kyonene kyonene eky'okubajuna. 17Ti kugir'oti akesiga kushai aha rw'okuba tukamushaba, nawe akashangwa nayenda muno kujuna abantu, yagoba aha kuramura omu bweyendezibwe kwija okwo. 18Twamutweka na murumuna waitu omoi alikumanyika omu nteeko zona aha rw'eiranga ly'okuranga evangeli. 19Mara t'ekyo kyonkai: Enteko zikamuronda kuta nagenda na ichwe tukakora hamoi omulimo gurungi ogu ogwo tuliho. 20Nitwelinda batatulisa mpiya ezi ezo batukwasize. 21Nitugonza kukolera Omukama n'abantu. 22Hamoi na barumuna baitu abo, twatweka murumuna waitu ondijo; ogwo tubandize twamulebelera muno, twabona okwo aina ekihika ky'okujuna banu, nangu kandi mbwenu ashaagireho aha rw'okuba inywe nabesiga muno. 23Tito ogwo ni mutahi wange; omu kubakolera n'inyema nawe. Kyonkai barumuna baitu aba, abo balikwija nabo, batwekirwe enteko, mara bonene abo kitinwa kya Kirisito. 24Kityo mubakolere kurungi omu nteeko, ebyo tubebugaho babibone.

will be added

X\