2 ABAKORINTO 7

1Kityo bagonzibwa, orwo twashubiziibwe ebintu nk'ebi, twenyinye buli kahagare ak'omubili n'omwoyo, tutine Ruhanga, tube bagorogoki omu butakatifu. 2Mutukingulire emitima yanyu. Titukakoleraga muntu kubi; titukasitazaga muntu, anga kugobeza muntu. 3Tindikugamba bigambo ebi kubakwata mushango, kuba ndabagambiire okwo mutwikara omu mwoyo, tufe hamoi, turore hamoi. 4Nyina obwesige bungi omuli inywe; nimbebuga muno, ndige muno. Omu naku zaitu zona ebyera biraliire kunyita. 5Katwagobire Masedonia, titwahumwire. Tukagwerwa enaku buli rubaju, aheru n'omunda: Baturwanisa twatina. 6Kyonkai Ruhanga nyamuhumuliza abashobeirwe, akatumaramaza okwija kwa Tito, 7tikwija kwa wenene kwonkai, kyonkai mpaho n'okumumaramara okwo mwamumaramazire. Nk'okwo mwangambiire okwo mwina orushusho rwange, okwo mujunaire, n'okwo mulikundwanilira, ebyo nabyo bikanyongera ebyera. 8N'orwo ndaba nabashasize omu barua yange, tindikugyechuza (n'orwo nagyechulize). Nimbona okwo ebarua egyo yabashasizekwo, n'orwo etabashasize mwanya gurai. 9Nk'okwo bili, inye ninshemelerwa, ti rwa nshonga ya inywe kushasha, kyonkai kubona mukashasha mwashuba mwayechuza; mukashasha mwagaruka ahali Ruhanga, aha rw'ekyo ichwe titwabashasize n'akake. 10Okushasha mukagaruka ahali Ruhanga kurugwamu okwechuza; kandi okwechuza kurokora omuntu, mara omuntu takwechuza. Kyonkai obushasi obw'ekinyansi burugwamu orufu. 11Na inywe mulebe obushasi obubagarwire ahali Ruhanga okwo bubagilize ekihika, mwagira amani g'okweyoga entambara, mwatamwa okufakara, mwagira obutini, mwagira orushusho n'obujwahuki, n'okugonza kubona amazima nigahonderwa. Omu bigambo ebyo nimweyoleka okwo mutainamu ntambara. 12N'orwo kili kityo tinabahandikiire ngendeleire kujuna ayakozire kubi anga ayakoleirwe kubi. Nkahandika kakimanyikage ahali Ruhanga okwo mulikutugilira ekihika. 13Ekyo na ichwe kikatutera ekihika. Titwateirwe kihika kwonkai; na Tito akatuha ebyera ebishagireho aha rw'okumukorage okwo mwamukozirege. 14Nkabebuga ahali wenene, mara kandi na inywe timunkwese nshoni. Buli kanya tubagambira amazima, mara mwonene omwo ebyo twayebugire ahali Tito byazoka bili by'amazima. 15Kityo na wenene yayeyongera kubagonza, k'alikwijuka okwo inywena mwayanguhire kwekomya ebyo yabegesize, n'okwo mwamunyegeize n'ekitinwa kingi muno. 16Ninshemelerwa kubona okwo nyina obwesige emalimali omuli inywe.

will be added

X\