2 ABAKORINTO 6

1Ichwe abahwezi ba Ruhanga nitubatagiliza, ekishakye ekyo tulikubona kitabafera bushai. 2Ruhanga wenene nagamba ati, «Akanya kakagobire nkakuhuliliza, ekiro ky'okurokoka kakyagobire nkakurokora.» Leba akanya nik'aka; leba kir'eki nikyo kiro ky'obuchunguzi. 3Titulikusitaza muntu, omulimo gwaitu gutaija gukagaywa. 4Kyonkai omu byo tulikukora byona nitwoleka okwo tuli bakozi ba Ruhanga: Nitwegumisiliza omu naku, omu biyengo, omu byemba, 5orwo tulikuterwa, orwo tulikufungwa, orwo tulikuhyokerwa, omu milimo y'ensika, orwo tulikuraara aha nkera, n'orwo tulikurumwa enjara; 6omu bwera bw'omwoyo, omu bumanyi, omu bwegumisiliza, omu kugira obufura, omuli Mwoyo Mutakatifu, omu ngonzi ezigobeleire; 7omu kugamba amazima, n'omu bushobora bwa Ruhanga; nitukoza ebikwato by'obugorogoki omu ndashana n'omu kwelinda; 8orwo tulikukunirwa n'orwo tulikugaywa, tulikaitwa ibara anga tulikagambwa kurungi. 9Twashusha abatalikumanyika, kandi okwo nitumanyika muno; twashusha oti tufire, kandi okwo niturora. N'orwo batubonabonyize tibatwisire. 10N'orwo tuli bajune, buli kanya nitushemelerwa. N'orwo tuli banaku, abantu abandi nitubatungisa, nitushusha abataina kantu, kyonkai twina buli kantu. 11Inywe Bakorinto, katubagambire emitima tugishanshurwire. 12Ichwe titulikubafundagatanisa. Inywe n'inywe mulikwefundagatanisa. 13Mbwenu nimbagambira nk'alikugambira abaana; na inywe kwakwo mushanshurure emitima. 14Mutakumanyirana na batakansi. Obugorogoki n'omutima gubi bigendanwa? Omushana n'omwilima byakwikara hamoi? Beliali omu Ruyahudi ni Sitani omunyarwango. 15Kirisito yakushobokerwangana atai na Beliali? 16Rwensinga ya Ruhanga yakutahwangana etai n'ebihuuku? Ichwe tuli Rwensinga ya Ruhanga asingire; nk'okwo Ruhanga wenene yagambire ati, «Nditura nabo mara nyikare nabo, ndiba Ruhanga wabo, na bonene baliba ihanga lyange. 17Aha rw'ekyo mubarugemu, mutaishukane nabo, alikugamba Mukama, mutalikwata kintu ekihagaire; 18aho ndibanyegeza, na inywe mube baana bange; nikwo Omukama Rushoborabyona alikugamba.»

will be added

X\