2 ABAKORINTO 5

1Nitumanya okwo eihema eli elyo tulikuturamu omu nsi kalilimara kukambuka, Ruhanga alitwombekera enju, enju ey'eirai lyona omw'iguru, etayombekirwe mikono. 2Mazima kunu omu nsi tuliho nitwanja, nituramiiliza kugya omu buturo obw'omw'iguru, 3tugye omu buturo obwo, tutalija tukashusha abatajwete. 4Orwo tukyali omw'ihema eli nitwanja aha rw'enshonga y'enaku, ti kugir'oti nitwenda kufa, chei, nitwenda kuba batakatifu, nirwo emibili yaitu elitungwa oburora obutalihwaho. 5Ruhanga n'iwe alikututekatekera oburora obu, natuha na Mwoyowe kutumanyisa okwo aina ebyo atubikiire. 6Nikwo tulikwikara tugizire obwesige. Nitumanya okwo orwo tulikuhondera amairu g'omubili nituba tutaishukaine n'Omukama, 7aha rw'okuba nitukora ebyo tulikwikiliza, bitali byotulikubona. 8Nitwikara tugumire, nitubona hakili kujwangana n'Omukama kushaga okuhondera amairu g'omubili. 9Kityo tulikarora anga tulikafa, ekyo tulikwitanira ni kumushemeleza. 10Nobona tuliragirwa kwemelera omu maisho g'enketo ya Kirisito k'aturamura, buli muntu abone erongoro anga ashendwe, kuhondera ebyo alishangwa akozire omu burorabwe. 11Ahakuba nitutina Omukama, nikyo tulikwegeshelereza abantu. Ruhanga natumanya kabutekire, kandi ninshubira na inywe emitima yanyu ekyo nekimanya. 12Titulikugonza kushuba kuboleka okwo ichwe tuli bantu b'amazima, nitugonza kubaha obushango bw'okutwebuga, mubone kuhororangana n'abalikwesiga oburungi bw'omuntu obw'aha maisho, kandi oburungi bw'omutima obwo tibabuliho. 13Katuraba tuli bararu, tuli bararu aha rwa Ruhanga; katuraba tutali bararu, tituli bararu tubone kujuna inywe. 14Engonzi za Kirisito nizo zilikutubarabata, aha nitumanya okwo yafeleire abantu bona; aha rw'ekyo abantu bona bakafa nawe. 15Mara Kirisito akafera abantu bona, balinya abakyarora babe batakikora ebyo bonene balikugonza, bakore ebyo wenene alikugonza, ogwo ayabafelekeleire akashuba akahimbuka aha rwabo. 16Kityo titukiramura muntu wena wena omu mibonere y'abantu. N'orwo aha kanya nanka Kirisito tukamuramura tutyo, mbwenu titukiziza. 17Orwo omuntu alikumara kujwangana na Kirisito aba kitondwa ekihya; okwo abaire ali orwa mbere ebyo bihwa, aba muntu ondijo. 18Ebi byona nibikorwa Ruhanga ayatushoboize okulekera kumunoba mara akashuba akatukwasa omuruka gw'okushoboza n'abandi kulekera kumunoba. 19Nikwo kugir'oti omuli Kirisito Ruhanga akashoboza ensi kulekera kumunoba obuzira kwijuka ntambara zabo yashuba naichwe yaturagira katugamba okwo agarulira abantu. 20Kityonu ichwe tuli babaka ba Kirisito, nitubahana aha mwanya gwa Ruhanga. Nitubatagiliza tubataireho Kirisito, mugaruke ahali Ruhanga. 21Kirisito atamanyaga bufu Ruhanga akamuhindura mufakare aha rwaitu, kityo tujwangaine na Kirisito wenene, tushobore kuba bagorogoki ba Ruhanga.

will be added

X\