2 ABAKORINTO 4

1Ruhanga akatuganyira yatukwasa omuruka ogu katugukora, kityo titulikunanukwa. 2Eby'enshoni twabilekeire, eby'okugobeza banu titulikubyenda, nangu n'okuhindurana ekigambo kya Ruhanga. Kyonkai amazima nitugagamba orubona, buli muntu ashobore kutusiima ebyo tulikukora omu maisho ga Ruhanga. 3Nangu n'orwo evangeli yaitu eraba etalikushoboka, telikushoboka omuli balinya bonkai abalikusilika. 4Abalikusilika abo, bahumisiibwe ruhanga w'ensi egi omu mitima yabo, batashamulirwa vangeli y'ekitinwa kya Kirisito, enshusho ya Ruhanga. 5Titulikweranga ichwe, nituranga okwo Kirisito aba Mukama, kandi ichwe tuli bakozi banyu aha rwa Yesu. 6Manya Ruhanga n'iwe yagambire ati, «Omu mwilima harugwemu omushana gwake,» n'iwe wenene ayayakize omushana omu mitima yaitu kutumanyisa ekitinwa kya Ruhanga ekyo tumanyira ahali Kirisito. 7Kyonkai eitunga eli tulibiikire omu bikwato by'eibumba, kwoleka okwo obushobora obushagulirane butaba bwaitu, buba bwa Ruhanga. 8Twina enaku za buli ngeli, kyonkai titulikufa; twina amashoberwa kyonkai titulikufa mutima; 9nitugingizibwa kyonkai titulikunagiranwa; nitubona ebiyengo kyonkai nitukira. 10Nitushasha kugoba aha kufa nka Yesu, twije tubone kuhimbuka nka wenene. 11Orwo tukyarora tulebeleire kwitwa kuturwa Yesu, Yesu ogwo aije atunge emibili yaitu elikwija kufa oburora. 12Kityo ichwe nitufa, inywe nimugira oburora. 13Kandi orwo tulikwikiliza nk'olinya ayahandikiire ati, «Ebyo naikiliize nibyo nagambire,» na ichwe kutyo nitwikiliza, mara nikwo tulikugamba, 14nitumanya okwo na Ruhanga ayahimbwire Omukama Yesu alituhimbura na Yesu mara atutahye hamoi na inywe omu busingebwe. 15Byona ebi n'aha bwanyu, nk'okwo abantu balikweyongera kubona ekisha babe nikwo bashaba n'esiimi ahali Ruhanga ow'ekitinwa. 16Ichwe titulikufa mutima. N'orwo aha bubili tulikugenda nituhwaho, emyoyo yaitu egyo negendelera kugira amani agahya. 17Nobona enaku za kanya aka ezitaina mbali zili nizija kutubonesa ekitinwa eky'eirai lyona ekitali kya kugambwa. 18Kuba eshubi yaitu teli mu bintu ebilikuboneka; eshubi yaitu eli omu bintu ebitalikuboneka. Ebilikuboneka bihwaho, kyonkai ebitalikuboneka ebyo biba by'eira lyona.

will be added

X\