2 ABAKORINTO 2

1Kityo mboine ntaija okwo rundi kubashasa. 2Aha rw'okuba kandabashasa, arampa ebyera n'ohai k'atali ogwo owo nashasa? 3Niyo nshonga nkabahandikira ebarua elinya. Nkabona ntaija wanyu abakumpaire ebyera bakaba nibo banshasa. 4Nkabahandikira obujune bundi kubi, nindira ningashaima. Tindikugendelera kubashasa, shana ningonza kubamanyisa obungi bw'engonzi ezo ndikubagonza. 5K'omuntu araba akozire eky'okushasa banu, tashasize inye nyenkai. Ntatairemu gungi nakugamba nti na inywe abashasize inywena. 6Omuntu nk'ogwo ekibonabonyio eky'abangi bamuhaire nikimumara. 7Kityo mugwelere mumuganyire mara mumumaramare, kitali kityo obujune bwakushagulirana bumukiza amani. 8Nimbatagiliza mumwoleke okwo inywe mulikumugonza. 9Orwo nabahandikiire ebarua elinya, nkaba ningonza kubalenga kumanya nk'ebyo ndikubaragira byona nimumpulira. 10Wena wena owo mulikugarulira, nanye kwakwo nimugarulira. Ebyo ngarulire, kaharaba haliyo ekyo ngarulire kyona kyona, mbilekire aha rwanyu omu mabona ga Kirisito 11kutanga Sitani ataija akatwihyaho magoba, ahakuba emitegoye nitugimanya. 12Orwo nagobire Toroasi kuranga evangeli ya Kirisito, Omukama yantunga akashango; 13kyonkai omwoyo gumbarabata aha rw'okutashangayo murumuna wange Tito. Kityo aho nirwo nabasigireho nkegendera Masedonia. 14Kyonkai Ruhanga nakasinge. Tujwangaine na Kirisito n'iwe atuha amani g'okusinga endashana. Atuha okurandisiliza Kirisito buli hantu okw'obona akataachu. 15Nobona ichwe nitushusha obunuma obulikununukage obwo Kirisito ahongera Ruhanga bukagoba abalikwesiga n'abalikwanga kwikiliza. 16Abalikwanga kwikiliza nibaitwa ekijunde ekilikunuka chuchuchu; kyonkai abalikwesiga, akataachu niko kalikubaha oburora. Mbwenu aho n'ohai alikwemera omwoga nk'ogu? 17Titulikushusha bantu bandi abali bangi, abalikutundurana ekigambo kya Ruhanga. Ruhanga ayatutumire n'iwe mujulizi waitu okwo tuli bairu ba Kirisito abalikugamba amazima.

will be added

X\