2 ABAKORINTO 12

1Kanyebuge, n'orwo okwebuga kuraba kutaina mugasho. Kyonkai ebyo nabonekeirwe n'ebyo Omukama yanshuruliire nimbigamba. 2Nimanya omukirisito omoi ayashutwirwe akagoba omw'iguru lya kashatu, emyaka 14 eyahingura. Nka yabaire narora anga afire, ekyo tindikukimanya; nikimanywa Ruhanga. 3Ekiliho nimanya okwo omuntu ogu yashutwirwe akagoba Paradiso. Nka yabaire narora anga afire ekyo tindikukimanya, nikimanywa Ruhanga. 4Wenene ogwo akahulira ebitagambwa, eby'omuntu atakugamba. 5Mbwenu kanyebuge aha rw'omuntu ogu. Tindikwija kwebuga aha rwange shana nyebuge obujege bwange. 6N'orwo nakugonza kwebuga timbe mufera, aha rw'okuba ninyija kugamba amazima. Kyonkai ekyo ninkyenyinya, omuntu ataija akantekeleza kuba kushaaga okwo alikumbona anga kuhulira ebyo ndikugamba. 7Ntaija nkebuga nkashaagulirana aha rw'ebintu bingi ebyo nashuruliirwe, niyo nshonga nkachumitwa eihwa, niyo ntumwa ya Sitani, yambumbulikya, ntaija nkebuga nkatamu gungi. 8Nkatagiliza Omukama kashatu aha rw'enshonga y'ekigambo eki kakindugaho. 9Kyonkai wenene yangambira ati, «Ekisha kyange nikikumara, kuba omu bujege nimwo obushobora bwange obugobeleire bumanyikira.» Ninyija kugendelera kwebuga obujege bwange, nyije mbone kugira amani ga Kirisito. 10Niyo nshonga ninshemelerwa kuba mujege, banjume, nshashe, banyite kubi, mpangarwe n'omwoyo nibantura Kirisito. Ahakuba orwo ndikuba mujege nirwo ndikugira amani. 11Honene inye mbaire mufera! Kyonkai n'inywe mwankakire kuba ntyo, kuba inywe mwakuragiirwe kumpa eibara lirungi. Nobona n'orwo ndaba ntaina kwo ndi, entumwa ezo ezikuru muno tizina kyozilikunkizaho n'akati. 12Okwegumisiliza kwange okutali kuke, obubonero n'eby'okutangaza n'ebigiro by'amani ebyo nabakoleire nibwo bubonero obw'entumwa ey'amazima. 13Ni kihai eky'enteko ezindi zabakilizeho? Leba nainywe tinababeleire rusampekire. Munganyire entambara egyo! 14Mbwenu ndiyo n'inyetekateka kwija okwo omurundi gwa kashatu. Kandi tindikwija kubabera rusampekire. Ebyo mwinabyo tibyo ndikuhiga, shanasi nimpiga inywe. Kuba abaana tibo baragirwa kubisira bazaire babo; abazaire nibo balikuragirwa kubisira abana babo. 15Ndashemelerwa muno munonga kwehayo, mara nyeheyo kurokora emyoyo yanyu. Kandaba nimbagonza muno, inywe aho mungonze mpora? 16Inywe nimugira muti tinakubabeleire rusampekire, kyonkai muti nkabakiza obwenge nabagobeza. 17Isi omuli balinya abo nabatwekeire halimu owo nabatwekeire kubanyihiraho akagoba kona kona? 18Tito n'iwe natagiliize kwija okwo, nashuba namutaho murumuna waitu omoi. Isi Tito wenene ogwo aina akameka ako yabaihireho? Manya wenene nanye twakoraga bimoi! Tukatambuka ntambuka emoi. 19Lero aho mbali mukatulira mulenga muti ichwe tukaba nitweyeza ahali inywe? Bagonzibwa, ebyo tukagamba tubigamba omu mabona ga Ruhanga twemirwemu Kirisito, mara ebyo tubigamba kwombeka inywe. 20Nangu nintina nti haliho orwo nakwija nkabashanga muli okwo ntakwenzire kubashanga, anga inywe kumbona ndi okwo mutakugondize kumbona ndi: Haliho orwo yakubaho enkungana, ekiisho, ebiniga, okweyenda, okuhagikangana, einwa, okwetutumura n'etabangu. 21Mara kandi nintina kandagaruka haliho orwo Ruhanga yakunfutika omu maisho ganyu nkaragirwa kuchulira abafakaire ruli mara batakechuzaga buhagare bwabo, na bujanga, na mairu gabo gabi.

will be added

X\