2 ABAKORINTO 11

1Kamwakutekaniire obufera bwange! Muntekanire. 2Nimpulira nimbabubira okwo Ruhanga abubira ab'agonza, mbone kubasiigira mushaija omoi kubagobya ahali Kirisito nimushusha omugore entahagara. 3Kyonkai nintina. Nk'okwo enjoka yakolize obwenge ekabeiyabeiya Eva, nikwo nainywe ebitekelezo byanyu bilikwija kuhaba mukalekera kuba besigwa ahali Kirisito, mukalekera n'okumugonza engonzi ezihikire. 4K'omuntu araija akabarangira Yesu ondijo atali owo twabarangiire, anga mukagibwamu omutima ogundi ogwo mutagirwemu rwa mbere, anga mukesiga evangeli endijo etali eyo mwaikiliize, ebintu nk'ebyo nimwija kubitora bwangu. 5Tindikulenga nk'omu ntumwa ezikuru inye ndi ntumwa ey'ahansi. 6N'orwo ndaba ntalikumanya kugamba, tikwo kugir'oti tindikumanya kantu. Ebi byona tukabibashoborora kabutekire okwo twabaire nitushobora. 7Isi inye kanayetohize inywe kamutungama, nkakora obufu, aha rw'okuba nkabarangira evangeli ya Ruhanga mutaina kyomumpaire? 8Nka nanyagire enteko ezindi, orwo naikiliize kutora eshumbusho eyo bagizire, mbone kujuna inywe! 9Orwo nabaire ndi okwo nkaburabulirwa, kyonkai taliho wonabeleire rusampekire. Eby'okunyamba bikagirwa barumuna baitu abarugire Masedonia. Kityo nketanga mara ndiguma nyetangire kubera omuntu wena wena orusampekire. 10Ningamba amazima aga Kirisito; kityo taliho alikwija kunsiza ntebuga ntyo omu mikoa ya Akaya. 11Isi kubaki? Aha rw'okuba tindikubagonza? Manya Ruhanga namanya okwo ndikubagonza. 12Mara ebyo ndikukora ndiguma mbikozire, nyije mbone kumara amani abalikweshalingya okwo emikolere yabo n'eyaitu niy'emoi. 13Abantu nk'aba ntumwa z'ebishuba, bakozi engobya, abalikwehindura ntumwa za Kirisito. 14Kandi mutakutangara! Kuba na Sitani ayehindura mumalaika w'omushana. 15Kityo ekyo tikilikushobeza k'abakozi ba Sitani baraba nibehindura bakozi abaina obugorogoki. Ebikorwa byabo ebyo bilibatoijera. 16Kanshubemu: Omuntu atandenga mufera. Kyonkai n'orwo muraba nimundenga mutyo, kayo mundenge nk'omufera, buzima nanye nyesimeho kake. 17Ebyo ndikugamba tindikubigambisa bushobora bwa Ruhanga, nimbigamba nk'omufera, mara eki ninkyesiimira; 18orwo bangi besiimira ebintu by'ensi, nanye ndayesiima. 19Inywe nimushemelerwa kwemera ebifera, kandi okwo inywe muli bamanyi! 20Leba, inywe nimwemera omuntu kubahindura bairu, nimwemera omunyagi, n'alikubakoza kubaihyaho amagoba, n'alikubashaijuruza, n'alikubatera empi. 21Kangire nti ky'enshoni, kubona ichwe ebyo titwabishoboire! Kyonkai kyona kyona eky'omuntu alikumaza kwebuga, kangambe bundi mufera, nanye ekyo nimaza kukyebuga. 22Isi abo Bayahudi? Manya nanye ndi Muyahudi. Isi Baisiraeli? Manya nanye ndi Mwisiraeli. Isi nibatabuka ahali Aburahamu? Manya nanye n'iwe ntabukaho! 23Isi bairu ba Kirisito? Inye ninshaagaho; ahanu nagamba nk'omuraru, kuba emilimo y'amani ninkora eshaagireho, ninfungwa kushaaga abandi, okuterwa tinakubara, emirundi nyingi nagobire aha kwija kufa. 24Emirundi etanu Abayahudi banteire enshanju 39, kuburwaho rumoi kugoba 40. 25Ndateirwe enkoni kashatu; limoi nkaterwa amabare, kashatu emeli nizisinjagulika nzilimu, nindara omu nyanja ningisibamu. 26Omu ngendo zingi ezakambaireho ndaizire kugwa omu miiga, abashuga baija kummara oruguru, ngambeki Abayahudi baitu, leka abanyamahanga, naija kugwa omu kigo, n'omu irungu n'omu nyanja, na barumuna baitu ab'ebishuba baija kummara. 27Nafa nayosha, omuro gwambaho, enjara n'eiliho biti nkuboine, emirundi nyingi naburwa ekyakulya, embeho n'okuburwa eky'okujwara nabyo ebyo byambaho. 28Kandi n'orwo ebindi nakuba ntabigambire, enteko zona zitura zimpangaire. 29Ow'okuburwa amani inye gatambuzire n'ohai? Owo balikugwisa inye ntatamirwe yab'ohai? 30Kakuraba kuli kwebuga, kanyebuge ebikozirwe obujege bwange. 31Ruhanga olinya Ishe Omukama Yesu namanya okwo ntalikubeiya. 32Omuli Damasiko gavana ayabaire atairweho Omukama Aretasi, akalinda ekigo ekyo agondize kunkwata. 33Kyonkai bakanteka omu kitukuru bansongolera omw'idirisha ly'orukuta namuruga ntyo omu mikono.

will be added

X\