2 ABAKORINTO 1

1Inye Paulo, owo Ruhanga yagondize kamba ntumwa ya Yesu Kirisito, hamoi na Timotheo murumuna waitu, nitubahandikira inywe ab'enteko ya Ruhanga eya Korinto, hamoi n'abakirisito ba Akaya yona: 2Ruhanga Isheichwe n'Omukama Yesu Kirisito babagilire ekisha babatunge n'emilembe. 3Agingizibwe Ruhanga mara Ishe Omukama waitu Yesu Kirisito, Isheichwe omuganyizi mara omujuni omuli byona. 4N'iwe atuhumuliza omu naku zona, tubone kuhumuliza abaina enaku zona zona, tubahumulize nk'okwo ichwe chwenene Ruhanga atuhumuliza. 5Nk'okwo tulikushasha muno na Kirisito, nikwo tulikumara marwa tujwangaine na Kirisito wenene. 6Katulikubona enaku, nituzibona kamubona kumaramarwa n'okurokoka. Katulikumaramarwa, nitumaramarwa kamumaramarwa, nk'okwo mulikwebonera orwo mulikushasha nimwegumisiliza nk'okwo ichwe chwenene tulikushasha. 7Ichwe twina eshubi etalikuyuga. Aha rw'okuba nitumanya okwo orwo mulikushasha naichwe, nikwo mulimaramarwa hamoi naichwe. 8Barumuna bange, nitugonza kubamanyisa enaku ezo twaboine Asia. Tukabona enaku ezitali za kugambwa, twayejuma n'omwoyo. 9Tukehulira oti baturamwire kutwasha; kyonkai enaku ezo zikaba zili z'okutwegesa tutesiga mani gaitu, shana kwesiga Ruhanga ahimbura abafu. 10Akaturokora aha ndebekelero y'orufu; mara aliturokora; twina eshubi omuli wenene okwo alishuba akaturokore. 11Na inywe nimuragirwa kutujunisa enshara nirwo Ruhanga arahulira enshara zitali zike ezo mulikutushabira kumusiimira omugisha ogwo tulikutungwa; omu kututunga atyo naba nahorora enshara zingi. 12Nitwebuga tuti: Omu mitima yaitu okwo oburora bwaitu omu nsi omu, okukiraho omuli inywe, bubaire buli burora nyakatetere obwo twatungirwe Ruhanga omu mani g'ekishakye, gatali mani ga bumanyi bwa bantu. 13Nitubahandikira ebyo murashobora kushoma mukashobokerwa. Ninshubira murashobokerwa bunyanungi, 14nk'okwo mwashobokeirweho kake, mwije mutwebuge nk'okwo ichwe twakwebuga inywe aha kiro ky'Omukama waitu Yesu. 15Eki mbaire ninkimanyage, niyo nshonga mbaire ningonza kubandiza owanyu kamushemelerwa kushagaho. 16Mbaire ningonza kubagobaho orwo ndikugya Masedonia, nkashuba nkagaruka okwo orwo ndikurugayo, mukashuba mukambonera eby'okugenda nabyo Buyahudi. 17Isi orwo nabaire nintekeleza nti nkaba nimpindukana? Nintegeka nk'omuntu wensi, kugamba «Ego» na «Chei» omu kanya kamoi? 18Obuso bwa Ruhanga omunyamazima, tukaba tutalikuhindukana omu byo twabagambiire. 19Yesu Kirisito Omwana wa Ruhanga, owo Silivano na Timotheo nanye twabarangiire akaba atalikuhinduka aha rulimi. Buli kanya yagambaga ekili ky'amazima. 20Nobona byona ebyo Ruhanga yaragaine, wenene n'iwe abigobesheleza. Niyo nshonga omu bushobora bwa wenene nitushobora kugamba tuti, «Amina» kuhaisiliza Ruhanga. 21Kyonkai Ruhanga n'iwe alikutujwanganisa na inywe omuli Kirisito: Akatukora amajuta, 22yatutaho omuhurigwe, yatuha Mwoyo, n'iwe mukwato omu mitima yaitu. 23Ninjuliza Ruhanga, n'iwe alikumanya omutima gwange! Okutaija Korinto nkagendelera kubaganyira inywe. 24Titulikubakaka kamwesiga; nitumanya okwo mugumire omu kwesiga. Ekiliho nituchwazikana na inywe kubaha ebyera, kuba omu kwesiga kwanyu mugumire.

will be added

X\