1 TIMOTEO 6

1Abairu bona bamanye okwo abakama babo b'okukunirwa muno, nirwo omuntu n'omoi ataije akajuma Ruhanga n'aha byo tulikubegesa. 2Abaina bakama babo abalikwikiliza batakubetwaliliza ngu aha rw'enshonga bakirisito batahi babo. Babakolere kurungi okushagaho, ahakuba bakama babo kabalikugasirwa eikora lyabo nibashangwa bali baikiliza mara bagonzibwa babo. 3Kaishe muntu wena ayegesa kundi, akanga ebilikwegesibwa ebilikugendanwa n'okwolekera ahali Ruhanga, 4ogwo naba aina eikuru, talikumanya kantu. Ogwo arwaire endwara y'empaka n'okuhakana omu bigambo kushai. Endwara z'engeli egi zizarukanwamu ekiisho, enkungana, okugeyangana n'okuramurangana kwonkai, 5n'empaka ez'abantu abafire amagezi, abatakimanya mazima, nibatekeleza ngu okugonza Ruhanga kalyo k'okuboneramu amagoba. 6Marakwo, okugonza Ruhanga n'okusanirwa kw'omutima biina amagoba gangi. 7Ahakuba ichwe titwina kyotwalesire mu nsi, mara taliho kyotwakwiha mu nsi. 8Katuraba twina ekyakulya n'ebijwaro, ebyo bigume bitumazire. 9Kyonkai abagonza kutunga abo bagwa omu kilengeso, bagwa omu kabi, begomba ebintu bingi eby'obufera mara ebilikubashasa ebiisa abantu. 10Nobona obugonza mpiya niyo eba ntabuko y'enaku zona. Akaruuju aka niko kaihire abantu abandi aha kwikiliza bakalihweramu, bakeletera enaku zingi. 11Kyonkai iwe mushaija wa Ruhanga, oyetamuze ebintu ebi byona. Oitanire obugorogoki, okugonza Ruhanga, okwesiga, engonzi, okutayugayuga n'obuchulezi. 12Orashane endashana nungi ey'okwesiga, oyekomeleze kimoi oburora obutalihwaho obwo wayeteirwe, obwo washubire okebuga omu maisho g'abajulizi batali bake. 13Omu maisho ga Ruhanga atunga ebintu byona oburora, n'omu maisho ga Yesu Kirisito ayayebugire okwesigakwe omu maisho ga Ponsio Pilato amalize, 14ninkukomekeleza kukwata omuhango ogu oli nzira kabi otaina ky'olikumogwaho kulemwa kugoba orwo Omukama waitu Yesu Kirisito alija. 15Omu kanya kabyo orwo kaligoba, Nyakusinga wenkai ow'ekitinwa, Omukama w'abakama, Rugaba Nyamukuru niwe alibita aha mushana, 16wenene mushai nyakumelera, asingire omu mushana ogutagobwa muntu, ow'omuntu atakabonaga, handiki kugir'oti yakumubona. Alikagira ngoma n'ekitinwa eirai lyona. Amina. 17Oragire abatungi omu nsi egi batakugira ikuru. N'eitunga elitaina rugero batalyesiga, shana besige Ruhanga asinga akatutunga buli kantu ak'okutushemelera atainamu kakukomelera. 18Kandi bakore kurungi, babe batungi b'ebikorwa birungi, bagire obufura bw'okugabira banu, babe banyakisha. 19Babe nikwo beyombekera batyo omusingi gurungi ogw'oburora obw'omu maisho, nirwo balibona kuguma omu burora obuli burora kwo. 20Iwe Timotheo, oralinda ebyo bakukwasize. Oyeshumbe efumoro y'okurogota ahali Ruhanga n'empaka za katozi ez'abantu abandi balikweta Bwegi. 21Haliho abalikweyeta begi, kyonkai ekibarugiire omwo banagiire okwikiliza kw'omukirisito. Omugisha gwa Ruhanga gube nainywe.

will be added

X\