1 TIMOTEO 4

1Mwoyo nagambira kimoi okwo bukiro obulija abandi balinaga okwikiliza aha rw'enshonga y'okuhuliliza amasitani agegesa ebishuba. 2Balinagwa obugobya bw'abagambi b'ebishuba ab'emitima etakihulira, 3abalikwanga obushwere, bakagimba abantu kweshasa bataliire byakulya ebyo Ruhanga yatonzire kabilibwa abalikwesiga nibasiima n'okumanya amazima. 4Buli kimoi ekyatonzirwe Ruhanga kiba kirungi. Eky'omuntu yatora nasiima tikyakwangwa kakiraba nikitorwa n'esiimi. 5Aha rw'okuba ekigambo kya Ruhanga n'enshara nibyo bibihindura bitakatifu. 6Ebigambo ebi k'orabishoborora barumuna baitu, oraba mukozi murungi wa Yesu Kirisito, nolya ebigambo by'okwikiliza n'okwegesa kurungi okwo wakwete. 7Abantu abatetaho Ruhanga otabafaho, nangu n'ebigano eby'obufera. Oyemanyiize okwolekera ahali Ruhanga. 8Omubili kugumanyiza eikora nikugasha kake, kyonkai okwetaho Ruhanga nikugasha omu ngeli zona, enshonga kwina ekyo kuturaganisa aha burora bw'amakiro aga n'obw'amakiro agalikwija. 9Ekigambo ekyo ky'amazima kandi kyokwikilizibwa kimoi. 10Nobona eki nikyo tufera tukosha, ahakuba tushubira Ruhanga asingire, Omurokozi w'abantu bona abalikwikiliza. 11Ebintu ebi obiragire barumuna bawe mara obyegese. 12Omuntu atakugaya aha rw'enshonga oli musigazi. Obe bulebero bw'abaikiliza omu migambire n'omu migilire, omu ngonzi, omu kwesiga, n'omu bwera bw'omwoyo. 13Kuhika orwo ndaija, oteho amani kushomera abantu Ebihandiko Bitakatifu, orange mara oyegese. 14Amatungwa gawe otagajajaaraho, kuba okagatungwa omu migambire y'abarangi orwo orukiiko rw'abagurusi rwakutaireho emikono. 15Ohikyega ebigambo ebi, obiteho omutima, abantu bona babone okwo olikweyongera kugya omu maisho. 16Oyelinde iwe wenene, oshube oyelinde n'omu by'olikwegesa. Orayekomya ebyo; kuba k'oragir'otyo orayerokora, oshube orokore n'abarakuhulilizaga.

will be added

X\