1 TIMOTEO 3

1Ekigambo eki ky'amazima: K'omuntu alikugonza kuba asikofu, naba agondize omulimo gurungi. 2Asikofu naragirwa kuba muntu ataina kya kugeywaho, abe mushaija aina omukazi omoi, alikwebalira, ow'amagezi, agire ekitinwa omu bantu, ashangwe nanyegeza abantu, kandi abe narahukirwa okwegesa. 3Ataba ntamiizi, ataba mukatili, abe muchulezi, ataba muntu wa nkungana, n'empiya zitamutwara mwoyo. 4Aragiirwe kumanya kugelera kurungi ekaye, abe muntu alikuhulirwa abanabe, kandi abe mukunirwa omu ngeli zona. 5Kuba k'omuntu alikulemwa kugelera kurungi ekaye, yakumanya atai enteko ya Ruhanga? 6Atashangwa ali muntu abaire mukirisito juba, kitali kityo yakwija ayeshalingya akwatwa omushango ogwakwete Sitani. 7Ab'aheru babe nibamusima, anga aho yakwija aba muntu w'okuneenwa bata nibamugeya. 8Abadiakoni kwakwo, bataba bantu ba muzano. Batahinduka aha rulimi, bataba ntamiizi za marwa, kandi omulimo gwabo ogwo bataguhigamu buhango na mpiya. 9Ekyebisho ky'okwesiga bakigumeho obuzira kabajoka. 10Kandi babanze balengwe. Kabarashangwa bataina kyobalikumogwaho, bajuburwe kukora omulimo gw'obudiakoni. 11Abadiakonikazi nabo nibargirwa kushangwa batali bantu ba muzano. Babe batalikugeya banu, bagire okwebalira, kandi babe besigwa omuli buli kantu. 12Abadiakoni bagire omukazi omoi, mara bamanye okulera kurungi abana babo n'okugeleera kurungi amaka gabo. 13Enshonga abakora kurungi omulimo gw'obudiakoni behaisa eibara lirungi n'obumanzi bungi omu kwesiga bajwangaine na Yesu Kirisito. 14Timotheo, ninshubira kukugobaho bwangu, kyonkai ebi nabikuhandikira kubikushoborora, 15nti rundi kanakukelererwaho oshangwe nomanya okwo omuntu ali w'okugira entwaza nungi omu nju ya Ruhanga, niyo nteko ya Ruhanga asingire, enyomyo mara engambiro y'amazima. 16Mara mazima nitwebuga okwo ekyebisho ky'edini yaitu kiba kihango: Ruhanga akaija ali muntu, Mwoyo yamujulira okwo ali w'amazima, abamalaika bamubona, yarangwa omu mahanga, omu nsi bamwesiga, yashuba yatemba n'ekitinwa omw'iguru.

will be added

X\