1 TIMOTEO 2

1Ekya mbere na mbere nimbatagiliza mushome enshara mutakilire abantu bona, mubashabire mara mubasiimire. 2Mushabire abakama n'abatwazi bona tubone oburora bw'emilembe, obw'obuchulezi, oburora obwolekeire ahali Ruhanga, mara tube bantu abasaine kukunirwa omuli byona. 3Ekigambo eki kirungi, mara nikishemelera Ruhanga Omurokozi waitu, 4agonza abantu bona kabarokoka mara bakamanya amazima. 5Ruhanga ab'omoi wenkai, n'omubaka wa Ruhanga n'abantu ab'omoi, mara omubaka ogwo aba Yesu Kirisito, 6ayayeyangire oburorabwe kuchungura abantu bona. Ebyo bikamanyikira omu bukiro bwabyo. 7Inye nkatewaho kuba murangi mara ntumwa (ningamba amazima mara tindikubeiya), mba mwegesa w'Abanyamahanga, mbarangire okwikiliza n'amazima. 8N'inyenda buli hantu abashaija babe nibo bata nibashoma enshara, baimukize emikono nyakatetere, abashaija enzira biniga na mpaka. 9Kwakwo n'abakazi belengye okwo kisaine, batashuka ishoke anga kulitekamu zahabu anga mabare ga iguzi anga kujwara emyendo ey'eiguzi lingi. 10Babe b'ebikorwa birungi nk'okwo abakazi abain'edini balikuragirwa kuba. 11Omukazi amanye kugira omuhuliro nyantayuga obuzira kukeleekeza rulimi. 12Tindikujubura mukazi kuba niwe ayegesa mushaija handiki kumutungama aha mutwe. Naragirwa kwesiza. 13Aha rw'okuba Adamu niwe yabumbirwe mbere, Eva yaruga nyuma. 14Adamu tiyabeihyabeihirwe; omukazi niwe yabeihyabeihirwe akafakara. 15Kyonkai omukazi alirokorwa okuzara abana, k'aliguma omu kwesiga n'omu ngonzi akaikara ali mutakatifu mara akaguma ayebaliire.

will be added

X\