1 TIMOTEO 1

1Inye Paulo, owo Ruhanga Omurokozi waitu na Yesu Kirisito eshubi yaitu bahangire kuba ntumwa ya Yesu Kirisito, 2ninkuhandikira Timotheo omwana wange ow'amazima owo twajwanganiire omu kwikiliza. Ruhanga Isheichwe na Yesu Kirisito Omukama waitu, bakutunge omugisha n'emilembe, mara bakuganyire. 3Nk'okwo nakukomeleize orwo nabaire ningya Masedonia, oikare Efeso obone kugira abo watanga kwegesa ebitalibyo. 4Obataise ebigano n'okusiiba nibatonda abagurusi b'enganda. Ebintu ebyo nibimukya empaka za bushai, kandi nibasigiilira omugendelero gwa Ruhanga ogw'okuturokora omu muhanda gw'okwesiga. 5Omugendelero gw'okukuragira ntyo ngonzi ezilikuruga aha njoka n'omutima gurungi n'okwesiga okw'amazima. 6Abantu abandi bakatantalikwa banagaho amazima anga bagya omu mpaka za katozi. 7Nibagonza kwegesa Amateka, kyonkai tibashobokerwa byo bagamba anga anga ebigambo ebyo bakaliliza. 8Nitumanya Amateka okwo gaba garungi k'omuntu agakoza okwo kisaine, 9akashobokerwa okwo gatatairweho aha rwa bagorogoki. Amateka gakatekwaho aha rw'abajeemi n'abatagira muhuliro, abatatina Ruhanga, abafakare, ababi, abasheegu, abaita baishebo na banyinabo n'abantu abandi, 10abantu enjanga, abashaija ensiyaga, abanyaga abantu bakatunda, abagambi b'ebishuba n'ababirahira, na buli kimoi ekitalikugenda na bilikwegesibwa eby'amazima 11kuhondera evangeli ya Ruhanga ow'ekitinwa eyo Ruhanga wenene yankwasize. 12Ninsiima Yesu Kirisito Omukama waitu ayantungire amani g'okukora omulimo ogu. Nimusiimira okunsiima akandonka kumukolera, 13n'orwo eirai namurogotagaho, namugingizaga, mujuma. Kyonkai akanganyira ahakuba nabikoraga ninyihwa aha butamanya bwange n'aha kutaikiliza. 14Nawe Omukama akangilira ekisha kingi, n'okwikiliza n'engonzi ebitabuka ahali Yesu Kirisito. 15Ekigambo eki ky'amazima, kisaine kutorwa bwoli: Okwo Yesu Kirisito yaizire omu nsi kurokora abafakare. Kandi omu bafakare n'inye mufakare rwituza. 16Kyonkai ekyo Yesu Kirisito yanganyiliire akenda kubonesa omuli inye, omufakare rwituza, obwegumisilizabwe nyakabara, mbe bulebero bw'abalikwenda kwikiliza kushobora kubona oburora obutalihwaho. 17Omukama w'amakiro gona, nyakumelera, ataboneka, wenene wenkai aba Ruhanga, ahabwe ekitinwa mara asingizibwe eirai lyona. Amina. 18Mwana wange Timotheo, ninkukwasa omulimo ogu, nk'okwo abarangi bakugambireho, ebyo bibe nibyo biba bikwato byawe eby'okurashanisa endashana egoshokire, 19ogume omu kwesiga n'omutima ogulikwera. Abantu abandi bakaburwa kuhulira eiraka ly'emitima yabo, baruga omu kwikiliza, basinjagulika nk'obwato omu nyanja. 20Omuli abo ni Himenayo na Alekisanda. Abo nkabachwa nabanagira Sitani, baije balekere okurogota.

will be added

X\