1 ABATESALONIKA 5

1Barumuna bange, taliho nshonga ya kubahandikira biro na birumo orwo ebi bilibaho. 2Inywe nywenene nimumanya okwo ekiro ky'Omukama kilija bundi mushuma omw'itumbi. 3Orwo abantu baliba nibagamba bati, «Milembe, taliho kabi,» nirwo akabuta kalibatera kibandagara nk'okwo ebisha bikwata omukazi w'enda, mara tibaliiruka. 4Kyonkai inywe barumuna bange, timuli mu mwilima, kugir'oti ekiro ekyo kilibagwaho kibandagara. 5Nobona inywe inywena muba bana b'omushana. Tituba bana ba kiro anga mwilima. 6Kityonu tutanagira nka banu. Twikare niturora, tutejaaka. 7Abanagira banagira kili kiro, n'abatamiira batamiira omu kiro. 8Kyonkai orwo tuli bana b'omushana tuleke kwejaaka. Omu kifuba tujware engabo y'okwesiga n'engonzi. Ehelumeta yaitu ebe shubi yaitu y'okurokoka. 9Aha Ruhanga talikututekatekera kibonabonyio. Nagonza katurokoka tujwangaine n'Omukama waitu Yesu Kirisito, 10ayatufelekeleire: Tulikaba niturora anga tufire tubone kurora hamoi na wenene. 11Aha rw'ekyo mugumisangane mara mutekanganemu amani, nk'okwo mulikugira mwaha. 12Kyonkai barumuna bange, nitubatagiliza mukunire abalikubakolera, kandi ni bakuru banyu omw'ibara ly'Omukama, mara nibabahana. 13Mubahe ekitinwa kingi muno mara mubagonze aha rw'omulimo gwabo. Mugire emilembe omuli inywe. 14Barumuna bange, nitubashaba mube nimuhana abanafu; abahahaine emitima mubagaruremu akoyo, abalikworoba mubajune, bona abo mubegumisilize. 15Mwelinde hatabaho muntu n'omoi ayayehoroza. Buli kanya muteho amani kukolerangana kurungi mara mukolere kurungi abantu bona. 16Mwikare nimushemelerwa, 17mushome enshara buli kaanya, 18omuli byona musiime, aha rw'enshonga Ruhanga nikwo alikubendera orwo mujwangaine na Yesu Kirisito. 19Mutasirasiza Mwoyo. 20Eby'abarangi balikuranga mutabigaya, 21kyonkaisi mutafa kwikiliza. Mugume aha bili birungi, 22kandi mwekenge ekili kibi omu ngeli yona yona. 23Ruhanga Omukama w'emilembe asinge abahindure batakatifu limoi limoi, kandi Omukama waitu Yesu Kirisito k'alija emitima yanyu n'emyoyo yanyu n'emibili yanyu bishangwe bigumire obuzira kamogo. 24Yesu Kirisito alikubeta aba mwesigwa, mara niwe wenene alikora ebyo. 25Barumuna bange mutushabire. 26Barumuna baitu bona mubakeise n'omunywegero gutakatifu. 27Nimbatagiliza mbataireho Omukama, ebarua egi mugishomere barumuna baitu bona. 28Omugisha gw'Omukama waitu Yesu Kirisito gube nainywe.

will be added

X\