1 ABATESALONIKA 4

1Eky'enzindo barumuna bange, nitubatagiliza tubataireho Omukama Yesu, emirolere yanyu eyo mwinayo n'okushemeleza Ruhanga bigume byeyongere omu maisho; manyasi nikwo twabegesize. 2Nimumanya ebyo twabegesize twemire n'Omukama Yesu. 3Ruhanga nayenda kamuba batakatifu: Mwelinde obusiyani. 4Buli omoi agume ahali mukaziwe omu ntwaza y'obutakatifu n'ekitinwa. 5Aleke kutwarwa obunyama nk'abatakansi abatamanya Ruhanga. 6Omuntu atafakara anga kugobeza mukirisito mutahiwe omu kigambo eki, aha rw'okuba Omukama abonabonyia abakora batyo. Mara tukabatatira karai. 7Ruhanga tiyatwesire katuba bahagare; akatweta katuba batakatifu. 8Aha rw'ekyo buli muntu alikwanga ebigambo ebyo, talikwanga muntu shana nayanga Ruhanga, Ruhanga niwe abatunga Mwoyo Mutakatifu. 9Aha kugonza abakirisito barumuna banyu timulikwetaga muntu kukibahandikiraho. Ruhanga wenene arabegesize okugonzangana, 10mara abakirisito barumuna banyu bona omuli Masedonia yona nimubagonza. Kyonkai barumuna bange nitubatagiliza aho mugendelere kushaagaho. 11Mwitanire oburora bw'obuchulezi, omuntu amanye omulimogwe, mara mukore emilimo nk'okwo twabaragiire. 12Aho nirwo abatakaikiliza barabakunira, mara mutakushabiliza mu bandi. 13Barumuna bange, nitugonza mumanye amazima ahali balinya abafire, mutaija mukata nimujunara nk'abatagira shubi. 14Orwo tulikwikiliza okwo Yesu yafire akashuba akahimbuka, nikwo Ruhanga alihimbura abafire bajwangaine na Yesu. 15Eki nitukibagambira nitujuliza ekigambo ky'Omukama, okwo ichwe abakyarora, abakyaliho kuhika orwo Omukama alija, titulyebembera abafire. 16Omukama wenene aliruga omw'iguru nahanga n'eiraka lihango, omumalaika mukuru nayeta, enzamba ya Ruhanga netaaga. Abafire bajwangaine na Kirisito nibo balihimbuka mbere. 17Aho ichwe abalikurora abakyaliho, tulibakiranwa n'abahimbuke abo omu bichwi kwakilira Omukama eiguru. Kityo tulituura n'Omukama ebiro byona. 18Aha rw'ekyo mumaramazangane ebigambo ebyo.

will be added

X\