1 ABATESALONIKA 3

1Katwaboine twalemesibwa twabona hakili tusigare Atenzi ichwenkai. 2Twashuba twatweka Timotheo murumuna waitu mara omwiru wa Ruhanga, omurangi w'evangeli ya Kirisito. Tukamutweka k'abagumisa omu kwikiliza n'okubatamu ekihika, 3omuntu n'omoi ataija akayugumibwa naku ezi. Inywena nimumanya okwo obu nibwo buba buragirwa bwaitu. 4Nobona orwo twabaire tuli hamoi nainywe tukabagambira karai okwo enaku zabaire zitulindiliire; mara okwo mulikumanya nikwo byakabaire. 5Niyo nshonga kanayegumisilize bikanga, natumayo kumanya okwo muli omu kwesiga, aha rw'okutina nti rundi Sitani akabalengesa, kandi n'amani gaitu nigaija kufa bushai. 6Mbwenu orwo Timotheo arugire okwo akatugoba, akatwizira n'amakuru garungi ag'okwesiga kwanyu n'engonzi zanyu, yatubarulira n'okwo buli kaanya mulikutwijuka mara mwina orushusho rwaitu, nk'okwo naichwe tulikubagilira orushusho. 7Aha nshonga egi barumuna bange, okwesiga kwanyu kutumaramazire omu bushasi bwaitu n'omu naku zaitu. 8Mbwenu aha twaguma kamuraikara mujwangaine n'Omukama mutamurugireho. 9Ruhanga tumusiime tutai aha rwanyu aha rw'ebyera byona ebyo tulikwehulira tuli omu mabonage? 10Kiro na mushana nitushoma enshara tushobore kubonangana na inywe twijulilize okwesiga kwanyu. 11Ruhanga waitu, Isheichwe wenene, n'Omukama waitu Yesu basinge batuhabure tubagobe. 12Omukama asinge abahe okweyongera kugira engonzi zingi muno, mugonzangane mara mugonze abantu bona nk'okwo ichwe tulikubagonza. 13Aho arabagumisa mube nyakatetere omu kwitanira obutakatifu omu mabona ga Ruhanga waitu mara Isheichwe orwo Omukama waitu Yesu alihabuka n'abatakatifube bona.

will be added

X\