1 Inywe nywenene barumuna baitu, nimumanya okwo orwo twaizire okwo titwateire muhurambwa. 2 N'orwo twabaire twashasire, batujangwire omuli Filipi, nimumanya okwo twayeyemiremu nitwesiga Ruhanga twabarangira evangeli ya wenene oku abandi nibatuhakanisa muno. 3 Ekyo tulikubagambira n'amani titulikubabeiya kugir'oti twina mugendelero gubi anga kugir'oti nitwenda kubagobeza. 4 Orwo Ruhanga yatusimire akatukwasa evangeli, aho titulikugamba kushemeleza bantu, shana kushemeleza Ruhanga alikumanya ebituli aha mutima. 5 Nimumanya okwo tutabajebeka, anga kubenza mpiya bwesheleke: Ruhanga niwe mujulizi waitu. 6 Kandi titwaitaniraga kitinwa mu bantu, alikaba inywe anga bantu bandi, n'orwo twakushoboire kugira ebyo twabenza orwo tuli ntumwa za Kirisito. 7 Ekiliho tukababera bafura nk'okwo omulezi amanya abaana. 8 Kutyo nikwo naichwe twagondize inywe, tutagobire aha kubaha vangeli ya Ruhanga yonkai, nawe naichwe twabehongera; enshonga mukaba muli bagonzibwa baitu. 9 Barumuna bange nimumanya okwo twafire tukosha. Twakoraga kiro na mushana tutaija tukababera rusampekire orwo tulikubarangira evangeli ya Ruhanga. 10 Inywe muli bajulizi na Ruhanga kwakwo, okwo entwaza yaitu ahali inywe abaikiliza, yabaire eli ntakatifu, egorogokire mara etainamu kamogo. 11 Kuba nimumanya, nka ishemuntu n'abanabe, okwo twabahaire ebisha n'okubatamu amani kandi tukabaragira 12 kamurora oburora obushemeleire Ruhanga, alikubeta kamutaha omu bukamabwe n'omu kitinwakye. 13 Kandi naichwe titulikwosha kusima Ruhanga aha rw'ekigambo ekyo, kubona orwo mwatoire ekigambokye ekyo mwahuliire ahali ichwe, timwakikunzire nka kigambo kya bantu, mukakikunda okwo kikali, kigambo kya Ruhanga ekiina amani omuli inywe, abaikiliza. 14 Inywe barumuna baitu, mukarondora enteko za Ruhanga eza Buyahudi ezijwangaine omuli Yesu Kirisito. Nobona na barumuna banyu abanyansi bakabashasa nk'okwo na bonene Abayahudi babashasize. 15 Abayahudi bakaita Omukama Yesu n'abarangi, naichwe batubinga. Abantu abo batamisa Ruhanga, kandi bahakanisa buli muntu, 16 aha rw'enshonga nibatutanga kurangira Abanyamahanga bakarokoka; kityo bonene bafakare mara nibashuba nibeshumbura. Nawe kandi Ruhanga alemirwe yababonabonyia. 17 Barumuna bange, aha rw'enshonga tukaba tutaishukaine nainywe omwanya guke, aha bubili, ti aha mwoyo, tukataho amani katushuba kubonangana nainywe, kuba tukaba twina orushusho rungi. 18 Twagonzaga kwija okwo, lero inye Paulo orushusho tirwampwahoga, kyonkai Sitani akatuhimbira. 19 Isi eshubi yaitu n'ehai, anga ebyera byaitu, anga orukinga rwaitu ebyo twakwebugira Omukama waitu Yesu k'aliija? T'inywe? 20 Inywe n'inywe kitinwa kyaitu mara byera byaitu.
