1 ABATESALONIKA 1

1Inye Paulo, Siluwano na Timotheo, nituhandikira enteko y'Abatesalonika tujwangaine na Ruhanga Isheichwe n'Omukama Yesu Kirisito: Mugire omugisha n'emilembe. 2Buli kanya nitusima Ruhanga aha rw'enshonga yanyu inywena. Nitwikara nitubagamba omu nshara. 3Ahali Ruhanga Isheichwe nitwijuka okwesiga kwanyu okulikumanyikira omu bikorwa, n'engonzi zanyu ezilikubasindika kukoza amani, n'eshubi yanyu etalikuyuga eyo mwinayo omuli Yesu Kirisito Omukama waitu. 4Nitumanya okwo inywe, barumuna baitu abagonzibwa ba Ruhanga, wenene akabaronka. 5Nobona titwabarangiire vangeli mu bigambo bushai. Tukakoza obushobora, kandi Mwoyo Mutakatifu yatuhwera mara twabagambira tumalize ebyo tulikwikiliza. 6Nirwo mwaturondoire, mukarondora n'Omukama, aha rw'okuba mwarangirwaga oku nibabagingiiza. Kyonkai Mwoyo Mutakatifu yabakyanuraga mushemelerwa. 7Niyo nshonga mukaba bulebero bw'abalikwesiga bona omuli Masedonia na Akaya. 8Ekigambo ky'Omukama kyemire ahali inywe kyaraliira, ti muli Masedonia na Akaya mwonkai, kyonkai mpaho n'okwesiga kwanyu ahali Ruhanga kugobire buli hantu nangu titwina kyakugamba. 9Nobona nibabarura okwo mwatwakiiliire, n'okwo mwasigireho ebihuuku mukagya ahali Ruhanga, kukolera Ruhanga asingire mara ow'amazima, 10n'okulindilira Omwanawe kuruga omw'iguru, Omwanawe owo yahimbwire omu bafu, niwe Yesu alikwija kutukiza aha kibonabonyio ekilikwija.

will be added

X\