1 PETERO 4

1Orwo Kirisito yashasire omubili, nainywe mukwate ebikwato by'endashana, nikwo kugir'oti mutekeleze nka wenene. Omuntu ayashasha omubili tashubira kufakara, 2mubone kumara oburora bwanyu bw'omu nsi mutakitwarwa bunyama, shana kukora ebyo Ruhanga agonza. 3Omu makiro agahingwire eby'abanyamahanga bagonza ebyo mwakozire nibimara. Byonene ebyo nibwo bujanga, amairu g'obunyama, etamiiro, kulya kushaagulirana, kunywa kuzina kukeisa obwire, n'okufukamira ebihuuku. 4Abatakansi abo nibatangara kubona mutakyema nabo kujanga, mara nibabajuma. 5Kyonkasi muliragirwa kwetonda obusigire ahali Kirisito alikwija kuramura abarora n'abafire. 6Nikyo n'abafire barangiirwe evangeli babone kurora oburora bw'omwoyo nka Ruhanga, n'orwo barashangwa baramwirwe emiramulirwe ey'abantu. 7Amaheleruka ga buli kantu gali haihi. Kityo mwelinde mara mwebalire nirwo murashobora kushoma enshara. 8Ekilikushaga byona mugonzangane buli kaanya; engonzi zatilira amafu gangi. 9Mutahirangane mutalikweboroboita. 10Nk'okwo buli omoi yahairwe amatungwa, amatungwa ago agakoze aha rw'obuge bwa mutahiwe, mube bageleezi b'ekisha kya Ruhanga ekitali kya ngeli emoi. 11Alikugamba agambe nk'alikugamba eby'ashuruliirwe Ruhanga. Alikukolera banu akoze amaani ago Ruhanga amuhaire. Ruhanga abone kuhaisilizibwa omuli byona aha rwa Yesu Kirisito. Obushobora n'ekitiinwa biina wenene eirai lyona. Amina. 12Bagonzibwa, omuliro ogwizire kubalenga gutabatangaza, okw'obon'oti mwagwerwa eihano. 13Shana mushemelerwe kubona nimushasha nka Kirisito, mwije mubone kushanduka n'okushemelerwa k'aliboneka omu kitinwakye. 14Kamurajumwa nimuzira eibara lya Kirisito muraba muli baberwa, manya Mwoyo w'ekitinwa owa Ruhanga naba abaliho. 15Kyonkai hataligira muntu n'omoi omuli inywe ow'okubonabonyibwa aha rw'obwita muntu, anga obushuma, anga okukora kubi, anga kwetahya omu bitamukwete. 16K'omuntu arabonabona aha rw'okuba mukirisito, atakwatwa nshoni, shana asingize Ruhanga kubona ali mukirisito. 17Nobona obukiro bwagobire, eiramu nilibandiza aha ihanga lya Ruhanga. Mbwenu k'eiramu elyo liraba nilibandiza ahali ichwe, lero amaheleruka g'abatahulira vangeli ya Ruhanga garashusha gatai? 18Kandi, «K'omugorogoki araba atazilize kurokoka, atatina Ruhanga n'omufakare baragyahai?» 19Aha rw'ekyo abalikubonabona nk'okwo Ruhanga ayenzire bagume bakore kurungi, mara emyoyo yabo bagikwase omutonzi omwesigwa.

will be added

X\