1 PETERO 3

1Inywe bakazi muhulire bashaija banyu. Ka haraba haliho abatalikwikiliza kigambo kya Ruhanga, bashobore kuhindurwa emirolere ya bakazi babo bataina kigambo kyona kyona ekyo babagambire, 2orwo barabona emirolere yanyu emirungi eshemeire. 3Okwechuma kwanyu okw'emibili kutagiramu kusiba ishoke, okwelengya n'ezahabu n'okujwara ebishemeire. 4Okwechuma kwanyu kube kw'omunda aha mitima, ekijwaro ekitafa eky'eibare ly'eiguzi eky'omwoyo gw'obufura n'obuchulezi, ekirungi muno ahali Ruhanga. 5Nikwo n'eirai abakazi batakatifu abamanyaga Ruhanga n'okuhulira baibabo bajwaraga. 6Obulebero ni Sara; yahuliraga Aburahamu namweta «Mukama wange.» Leba mbwenu inywe muli baana ba Sara kamurata nimukorage mutalikusindikwa butini. 7Nainywe bashaija muture mutyo na bakazi banyu. Mukunire omukazi aha rw'okuba amanige gake kushaaga ag'omushaija, nobona inywe hamoi na bonene nimwija kugilirwa ekisha ekilibagiza oburora, enshara zanyu zitaliija zikakwatira. 8Eky'enzindo inywena mugire emitekelereze emoi, mushasirangane, mugonzangane bundi barumuna, mugilirangane embabazi n'omutima gw'obuchulezi. 9Muleke kwehorozangana anga omuntu kukujuma naiwe okamujuma. Omu mwanya gw'ebyo mwenderangane omugisha, manya ogwo nigwo mweto gwanyu, nirwo mulibona kutungwa omugisha. 10Manyasi, «Omuntu alikugonza kushemelerwa oburora, mara akagira emilembe orwo alikurora, ayelinde okugamba kubi, n'ekishuba kitalimurugaho. 11Alekere okufakara, akorege, agonze emilembe mara agiitanire. 12Omukama amaisho agataire aha bagorogoki, mara n'enshara zabo azihulira. Kyonkai abakora kubi abaleba kubi.» 13Mbwenu ow'okwija kubakora kubi n'ohai kamuraba mwina ekihika ky'okukora kurungi? 14Nangu n'orwo muraba nimushasha nimuturwa obugorogoki, muli baberwa. Mutabatina anga kusiiba nimufa kubi. 15Ekiliho muhe Kirisito ekitiinwa omu mitima yanyu, nimumanya okwo aba Mukama. Buli kaanya mwikare mwetekatekire kuhororangana n'omuntu alibashonshomora aha rw'eshubi yanyu eyo mwinayo. Kyonkai muhororangane nawe omu buchulezi n'amakune. 16Kandi mwikare n'emitima elikwera, orwo murajumwa, abalikubajumira emikaliire yanyu aha rw'omujwangano gwanyu na Kirisito baije bakwatwe enshoni. 17Kirungi kubonabona nimuturwa okukora kurungi, ka Ruhanga alikwenda atyo, kushaaga okubonabona aha rw'enshonga y'okushangwa mukozire kubi. 18Manyasi na Kirisito kayafire kwatilira entambara akafa limoi lyonkai, omugorogoki yafera abatali bagorogoki, agendeleire kutugobya ahali Ruhanga. Bakamwita omubili, tibamwisire mwoyo. 19Akagenda ali mwoyo gwonaka kurangira emyoyo eyabaire eli jela, 20nibo bantu aba karai abatahuliire Ruhanga orwo yabegumisiliize omu makiro ga Noa, orwo Noa yakora obwato. Obwato obwo nimwo abantu bake, munaana bonkai, bahungiiremu aha maizi bakakira, 21amaizi ago nigashura okubatiza okulikurokora inywe makiro aga. Okubatiza okwo tikulikwogya nziro za mubili, shana Ruhanga naba aina ekyo alikubaraganisa mara kimurugire aha mutima. Okubatiza kwonene nikubarokora aha rw'okuba Kirisito akahimbuka, 22yashuba yatemba omw'iguru, asingiire aha bulyo bwa Ruhanga, ali Mukama w'abamalaika, n'abatwazi n'abaina obushobora.

will be added

X\