1 PETERO 2

1Mulekere eitima, obugobya, akachubirano n'okuchwelererana. Ebi byona mubilekere omu ngeli zona. 2Mube nk'obukelemeke, mugonze amata, kyonkai amata agatakatifu ag'omwoyo, gabakuze gabagobye aha kurokoka. 3Manyasi mwarolizeho, mwamanyire okwo Ruhanga aba mufura. 4Mugobe Yesu Kirisito eibare ly'oburora, elyayangirwe abantu, kyonkai ahali Ruhanga likaba ibare elironkwa mara ely'eiguzi lihango. 5Mushushe amabaare g'oburora, murugwemu enju y'omwoyo, n'oruganda rutakatifu rw'abakuhani, mutambire Ruhanga ebitambo by'omwoyo ebilikumushemelera mwemire na Yesu Kirisito. 6Enshonga omu bihandiko kikahandiikwa kiti, «Leba omuli Sioni natekamu eibare, eibare ly'epembe elironkwa mara ely'eiguzi lihango, alikamwesiga talishonara.» 7Aha rw'ekyo ahali inywe abalikumwesiga Yesu Kirisito ogwo w'eiguzi lihango. Kyonkai ahali baliinya abatalikumwesiga, kikahandiikwa kiti, «Eibare lyonene lyonene elyayangirwe abombeki, nilyo lyabaire ly'epembe,» 8mara kandi, «Eibare elyo lilibasitaza, orwazi orulibagwisa.» Nibasitara kuba tibaina muhuliro orwo batalikukora nk'okwo bagambiirwe. 9Nawe inywe muli ihanga elironkwa, abakuhani b'Omukama, eihanga litakatifu, abantu ba Ruhanga, abe nyabwe, mubone kuranga oburungi bwa Yesu Kirisito ayabesire akabaihya omu mwilima, akabatahya omu mushanagwe katangaza. 10Eirai mukaba mutali ihanga, kyonkai mbwenu mwabaire ihanga lya Ruhanga; eirai mukaba mutagiliirwe buganyizi, kyonkai mbwenu mwagiliirwe obuganyizi. 11Abagonzibwa, nimbatagiliza, muli bafuruki mara bazahe, mwekenge amairu g'obunyama agatura nigabema kubi. 12Mugire emirolere mirungi omu Banyamahanga. Kityo n'orwo bakubagamba okwo muli babi, ahanyuma bashobore kubona ebikorwa byanyu ebirungi bashube basingize Ruhanga aha kiro ky'amaheleruka. 13Aha bwa Mukama muhulire buli butwazi. Alikaba ali rubamba nk'okwo omukama ali, 14anga abagavana abo ab'atumire kubonabonyia ababi n'okusiima abarungi, mubahulire. 15Aha rw'okuba Ruhanga nagonza kamukora kurungi mukabona kusiza abafera abatalikumanya kantu. 16Mugire emilembe aha mwoyo, mara emilembe etali ya bugobya. Mube bairu ba Ruhanga. 17Mukunire abantu bona. Mugonze bataahi banyu abalikwesiga. Mutine Ruhanga kandi mukunire omukuru w'eihanga. 18Inywe bairu muhulire bakama banyu n'okubakunira muno. Mutahulira bafura na barungi bonkai, kyonkai n'ab'omwaga mubahulire. 19Nobona omuntu ayegumisiliza obushasi nibamutura bushai, mara kandi ateebire Ruhanga, omuntu nk'ogwo asiimwa. 20Mwakusiimwa aha rwa nshongaki kamuraba nimwegumisiliza okuterwa ahakuba mufakaire? Nawe kamulikukorage mukaba nirwo muterwa kyonkai mukegumisiliza, aho Ruhanga nabasiima. 21Ogu nigwo mweto gwanyu, kuba na Kirisito akabashasira, yabasigira obulebero mushobore kumurondora. 22Wenene tiyakozire bufu mara tiyabeiyaga. 23Kyonkai kabamujumire tiyabagarukiremu kubajuma. Akashaasha kyonkai tiyakangire muntu; shana akesiga omuramuzi w'amazima. 24Akatilira amafu gaitu aha muti k'atugalekera tukaba bagorogoki. Amahutage gakakiza inywe. 25Mukaba muhabire nk'entaama, kyonkai mbwenu mugarukire aha Mushumba mara Omulinzi w'emyoyo yanyu.

will be added

X\