1 PETERO 1

1Inye Petero, entumwa ya Yesu Kirisito, n'inye ndikubahandikira inywe bazahe abenaganagire, abali Ponto, Galasia, Kapadokia, Asia na Bitinia. 2Ruhanga Isheichwe akabaronka aina omugendelero aha rwanyu, kandi Mwoyo yabahindura batakatifu kamugira omuhuliro ahali Yesu Kirisito mukashuba mukahasilirwa obwambabwe. Mugire omugisha gungi n'emilembe etali mike. 3Nakasinge Ruhanga Ishe Omukama waitu Yesu Kirisito! Aha rw'obuganyizibwe obungi tukazarwa bundi buhya, twagira eshubi ey'ebiro byona aha rw'okuba Yesu Kirisito akahimbuka omu bafu. 4Mara aho tulindiliire obusika obw'eira lyona, obutainamu kamogo, obutahwaho. Obusika obwo mwabutekatekeirwe omw'iguru, 5inywe abo Ruhanga alikulinda omu bushobora bwa wenene aha rw'okwesiga kwanyu, mushobore kurokoka omu kurokoka okulimanyika aha maheleruka. 6Aha rw'ekyo mushemelerwe, n'orwo rundi mwakuragirwa kushashaho akabanga kake omu biyengo ebitali bimoi. 7Ebiyengo ebyo nibibagumisa omu kwesiga, okwesiga kuba kw'eiguzi kushaaga ezahabu ehwaho n'orwo bagijuguta omu muliro. Orwo Yesu Kirisito aliija okwesiga kwanyu kulibasiimisa, kulibabonesa ekitinwa, kulibaha okukunirwa. 8Inywe timukamubonaga kyonkai nimumugonza. N'orwo mutalikumubona mwaha nimumwesiga mara mwina n'amashemelerwa agatali ga kugambwa. 9Okwesiga kwanyu kulibarugiramu okurokora emyoyo yanyu. 10Abarangi abarangaga omugisha ogwo mwabaire nimwija kugilirwa, bakabaza mara banyomoza aha burokozi obu. 11Bahenjuzaga ni muntu wa ngeliki n'amakiroki ebyo Mwoyo wa Kirisito ayabaire abasingiiremu yabashuruliraga, akabamanyisa n'obushasi bwa Kirisito butakabaireho, n'ekitinwakye ekilikuhonderaho. 12Bakashuruliwa bamanya okwo omulimo gw'oburangi babaire batalikugukora aha bwabo; bakaba nibagukora aha bwanyu, baranga amakuru ago mwagambiirwe ababarangiire evangeli omu mani ga Mwoyo Mutakatifu owo mwatwekeirwe kuruga omw'iguru, amakuru ago abamalaika bagonza kubona. 13Aha rw'ekyo mweyememu mugume emitima, mwelinde muno, mushubire omugisha ogwo mulikwija kutungwa aha maija ga Yesu Kirisito. 14Mube baana b'omuhuliro, mutegarukana bunyama obwo mwagiraga aha rw'obutamanya bwanyu. 15Omu ntwaza zanyu zona mube batakatifu nka Ruhanga ayabesire. 16Kikahandikwa kiti, «Mube batakatifu, aha rw'okuba inye mba Mutakatifu.» 17Kandi kamuratakira Ruhanga aramura buli omoi kuhondera ebikorwabye, atamugiliire kigonzi, niwe Isheichwe, murarora kurungi nimumutina ebiro byona orwo muli omu buzahe. 18Nimumanya okwo mwachungwirwe omu michwo yanyu etaina mugasho eyo mwaihire ahali bashw'enkurw'inywe. Timwachunguziibwe bintu ebihwaho nk'efeza n'ezahabu; 19mukachunguzibwa obwamba bwa Kirisito obw'eiguzi lihango, nk'obw'akataama akataina kamogo anga katalizi. 20Wenene akamanyika karai ensi etakatonzirwe, kyonkai yaija yaboneka orwo obukiro bwagobire aha rwanyu, 21inywe abo yashoboize kwesiga Ruhanga, ayamuhimbwire omu bafu akamutunga n'ekitiinwa, okwesiga kwanyu kubone kuba niyo shubi yanyu omuli Ruhanga. 22Mbwenu orwo mwamazire kuba batakatifu aha rw'okugira omuhuliro aha mazima, kushobora kugonza barumuna baanyu obumaramunda, mugonzangane muno engonzi ezilikuruga aha mutima. 23Mukazarwa bundi buhya mutarugire mu mbibo elikufa, mukaruga omu mbibo etafa, nikyo kigambo kya Ruhanga ekigiza oburora mara eky'eirai lyona. 24Nobona, «Abantu bona nibashusha obunyasi, n'oburungi bwabo nibushusha enyakyo z'ebikamba, ebikamba byoma, enyakyo ziragara, 25kyonkai ekigambo ky'Omukama kiba ky'eirai lyona.» Ekigambo ekyo niyo vangeli eyo mwarangiirwe.

will be added

X\