1 YOHANA 5

1Buli omoi aikiliza okwo Yesu aba Kirisito, ogwo aba ali mwana wa Ruhanga. Buli omoi agonza omuzaire agonza n'omwanawe. 2Orwo tugonza Ruhanga tukahulira n'emihangoye aho niho tumanyira okwo tulikugonza abaanabe. 3Manyasi ezi nizo ngonzi za Ruhanga: Kwekomya emihangoye. Nobona emihangoye tesikiilira muno muntu. 4Wena wena araba ali mwana wa Ruhanga asinga ensi; mara okwesiga nigo mani gasinga ensi. 5Asinga ensi n'ohai k'atali muntu aikiliza okwo Yesu aba Mwana wa Ruhanga? 6Yesu Kirisito ogu niwe yalesirwe omu maizi n'omubwamba. Tiyalesirwe mu maizi gonkai, akaletwa omu maizi n'omubwamba. 7Omujulizi ni Mwoyo, kuba Mwoyo aba mazima. 8Abajulizi bali bashatu: Mwoyo, amaizi n'obwamba; abajulizi bonshatu nibagamba kimoi. 9Katuraba nitwikiliza ebilikugambwa abantu, aho ebilikugambwa Ruhanga wenene biina amani kushaaga. Ruhanga nagamba okwo wenene niwe mujulizi w'Omwanawe. 10Omuntu aikiliza Omwana wa Ruhanga aba aina obujulizi nk'obu aha mutima. Omuntu ataikiliza Ruhanga ogwo aba nabeiyesa Ruhanga aha rw'okutaikiliza ebyo Ruhanga alikugamba aha Mwanawe. 11Obujulizi nibw'obu: Ruhanga akatutunga oburora obutalihwaho, mara oburora obu nibutabuka omu Mwanawe. 12Araba ajwangaine n'omwana ogwo aina oburora; atajwangaine na Mwana wa Ruhanga ogwo oburora tainabwo. 13Inywe abalikwikiliza Omwana wa Ruhanga, nimbahandikira okwo mwina oburora obutalihwaho. 14Mara nitumwikiliza omu kwikiliza oku, okwo kyona kyona ekyo turamushaba kuhondera okwo alikwenda aratuhulira. 15Kandi katulikumanya okwo alikutuhulira orwo tulikumushaba kyona kyona, nitumanya okwo ebyo tulikuba tumushabire nituba twabiboine. 16K'orabona murumuna wawe nakora entambara etakumurugirwamu rufu, oshome enshara ahali Ruhanga, aramutunga oburora. Eki kikwete ahali balinya abaina amafu agatakubarugirwamu rufu. Kyonkai haliho entambara ezarukanwamu orufu; egyo tiyo ntambara eyo ndikugamba kamwemaho kushoma enshara ahali Ruhanga. 17Buli kikorwa kibi eba ntambara, kyonkai haliho entambara etalikuzarukanwamu rufu. 18Nitumanya okwo kaishe muntu ayazairwe Ruhanga atafakara, nobona Omwana wa Ruhanga amulinda, n'omubisha taina kumukoraho. 19Nitumanya okwo tuli ba Ruhanga, kandi ensi yona eli omu mani g'omubisha. 20Ekindi nitumanya okwo Omwana wa Ruhanga yaizire mara akatuha okushobokerwa, tubone kumanya Ruhanga wenene ow'amazima; mara tujwangaine nawe, Ruhanga ow'amazima, hamoi n'Omwanawe Yesu Kirisito. Ogu niwe Ruhanga ow'amazima mara niwe burora obutalihwaho. 21Twana twange, murayelinda ebihuuku.

will be added

X\