1 YOHANA 3

1Mulebe engonzi ezo Isheichwe yatugiliire, ichwe kwetwa baana ba Ruhanga, mara nikwo tuli. Ekyo ensi etatumanyira niky'eki: Wenene tiyamumanyire. 2Mbwenu bagonzibwa bange, ichwe twabaire baana ba Ruhanga. Emishusire yaitu okwo tuliba tuli telikuboneka mwaha, kyonkai nitumanya okwo orwo aliija tulimushusha. Tulimubona nk'okwo aliba ali. 3Kandi buli omoi aina eshuubi egi ataho amaani kuba mutakatifu nk'okwo Kirisito wenene aba mutakatifu. 4Buli muntu akora obufu akwatwa omushango gw'obushengi; manyasi obufu buba bushengi. 5Nimumanya okwo yaizire kutugarulira amafu gaitu, mara wenene tiyakozire bufu. 6Taliho ajwangana na Kirisito akashuba akafakara. Kandi ayafakara ogwo takaabonaga Kirisito, n'okumumanya chei. 7Twana twange, omuntu atakubabeiya. Ayakakora eby'obugorogoki aba mugorogoki, okwo Kirisito wenene aba mugorogoki. 8Akora entambara aba wa Sitani, enshonga Sitani akafakara kwema karai. Ekyalesire Omwana wa Ruhanga akaija kuchwa amafu ga Sitani. 9Ayakazairwe Ruhanga tafakara, manyasi Ruhanga wenene wenene nyakabara aba asingiire omuli ogwo, mara tiyakufakara orwo ali Mwana wa Ruhanga. 10Aha niho abali baana ba Ruhanga n'abali baana ba Sitani bakubonekera. Atakora kurungi taba wa Ruhanga, nangu n'atagonza murumuna abulimu. 11Aga nigo makuru ago mwahuliire kwema aha mbandizo, okwo tulikuragirwa kugonzangana, 12tutashusha Kaini ayabaire ali wa Sitani akaita omurumuna. Isi akamwitiraki? Akamwita kuba wenene akaba ali muntu mubi, kandi omurumuna akaba ali mugorogoki. 13Barumuna bange mutatangara kubona nsi nebanoba. 14Nitumanya okwo twahimbukire, orwo tulikugonza barumuna baitu. Omuntu atagonza ogwo aba afire. 15Ayakanoba omurumuna aba mwisi, mara nimumanya okwo omwisi tagira burora obutalihwaho. 16Okutufera kwa Kirisito niho tumanyira engonzi kiki. Naichwe nituragirwa kufera barumuna baitu. 17Kyonkai k'omuntu araba ali mutungi, kandi omurumuna ali munaku akashuba akanga kumushumbusha, ogwo engonzi za Ruhanga ainazo ngeliki? 18Twana twange, tuleke kugonzangana omu bigambo anga aha rulimi kushai. Tugonzangane omu bikorwa n'omu mazima. 19Aha niho turamanyira okwo tuli b'amazima, tukagira n'obwesige ahali wenene. 20K'emitima yaitu elikutukeena, nitumanya okwo Ruhanga ali muhango kushaaga emitima yaitu yonene mara namanya buli kantu. 21Bagonzibwa bange k'emitima etatukeenire, nitugira obwesige ahali Ruhanga, 22n'ebyo tulikumushaba byona byona nabitutunga, aha rw'okukwata emihangoye n'okukora ebilikumushemelera. 23Omuhangogwe nigw'ogu: Twesige Omwanawe Yesu Kirisito mara tugonzangane, nk'okwo yatuhangre. 24Bona abekomya emihango ya wenene baikara bajwangaine nawe, nawe aikara ajwangaine nabo. Mwoyo owo yatutungire niwe tumanyiraho okwo Ruhanga asingiire omuli ichwe.

will be added

X\