1 YOHANA 2

1Twana twange, nimbahandikira ebigambo ebi mutaija mukafakara. Kyonkai k'omuntu yakufakara, twina omutongani waitu ahali Isheichwe, omutongani ogwo niwe Yesu Kirisito omugorogoki. 2Niwe ayatilira amafu gaitu, mara tayatilira gaitu gonkai, ayatilira n'amafu ag'ensi yona. 3Katurakwata emihangoye aho niho twakwema kugamba okwo tulikumumanya. 4Alikugamba ati, ┬źNimumanya,┬╗ kyonkai atakwete mihangoye ogwo mugambi w'ebishuba, kandi naba ataina mazima. 5Mara omuntu ayekomya ekigambokye, ogwo engonzize ahali Ruhanga niziba zihikiliire. Ahali eki niho twakumanyira okwo tujwangaine nawe. 6Omuntu alikugamba okwo ajwangaine na Kirisito naragirwa kuraba omuhanda gwonene gwonene ogwo Kirisito yarabiremu. 7Bagonzibwa bange, tindikubahandikira muhango guhya. Nimbahandikira omuhango ogukuru ogwo mwakaturaga nagwo kwema aha mbandizo. Omuhango ogukuru ogwo nikyo kigambo ekyo mwahuliire. 8Mara kandi ninshuba nimbahandikira omuhango oguhya, ahakuba amazima gagwo nigaboneka omuli Kirisito n'omuli inywe, orw'omwilima gulikugenda niguhwaho kandi omushana nyakabara gwajwire. 9Omuntu alikugamba okwo ajwangaine n'omushana kyonkai okwo nanoba omurumuna, ogwo akyajwangaine n'omwilima. 10Ayakagonza omurumuna aikara ajwangaine n'omushana, mara taina nshonga yoyakwemaho kusitara. 11Kyonkai ayakanoba omurumuna aba ajwangaine n'omwilima mbali alikugya talikuhamanya, manyasi omwilima gukamwigara amaisho. 12Twana twange, nimbahandikira aha rw'okuba aha rwa wenene nimugarulirwa amafu ganyu. 13Inywe baishebantu nimbahandikira, aha rw'enshonga okwo Ruhanga abaho kwema eirai lyona nimumanya. Nimbahandikira inywe basigazi, kuba musingire omubisha. Inywe baana nimbahandikira, kuba Isheichwe nimumumanya. 14Nimbahandikira inywe baishebantu aha rw'enshonga nimumanya Ruhanga abaho kwema eira lyona. Basigazi nimbahandikira kuba muli manzi, n'ekigambo kya Ruhanga kisingiire omuli inywe, mara musingire omubisha. 15Mutaligonza nsi anga kugonza bintu byayo. Omuntu k'agonza ensi aho engonzi ahali Isheichwe naba atainazo. 16Ebili omu nsi byona, nk'amairu g'omubili, ebishemelera amaisho, n'ebigiza abantu eikuru omu burora bwabo, ebyo Isheichwe tabigonza, shana ensi niyo ebigonza. 17Ensi ehwaho, n'amairu gayo gona. Kyonkai omuntu akora ebyo Ruhanga agonza, ogwo agumaho eirai lyona. 18Twana twange, akaanya aka k'amaheleeruka. Mwahuliire okwo omushengi wa Kirisito alikwija, kityo mbwenu ababisha bangi ba Kirisito baizire. Aha rw'ekyo nitumanya okwo akaanya aka kali k'amaheleeruka. 19Bakaturugamu, kyonkai bakaba batali baitu. Kabakubaire bali baitu bakutwikairemu. Kyonkai bakagenda kakimanyika bunyanungi okwo ti bona baitu. 20Kirisito akabatunga Mwoyo Mutakatifu, mara nainywe taliho kyomutalikumanya. 21Tindikubahandikira rwa nshonga timulikumanya mazima, amazima nimugamanya, mara nimumanya okwo omu mazima tabamu kishuba. 22Omugambi w'ebishuba t'ondijo, n'olinya alikwanga okwo Yesu ali Kirisito. Alikwanga Isheichwe n'Omwana, ogu mushengi wa Kirisito. 23Kaishe muntu ayanga Omwana ayanga na Isheichwe. Ayakunda Omwana akunda na Isheichwe. 24Ebyo mwahuliire kwema orwa mbere mubyekomye. Kamurayekomya ebyo mwahuliire kwema orwa mbere, aho muliguma mujwangaine na Mwana na Isheichwe. 25Ekyo yaturaganisize niky'eki: Oburora obutalihwaho. 26Ebi nabibahandikira ningamba ahali balinya abakugondize kubahabisa. 27Kyonkai Kirisito akabatunga Mwoyo Mutakatifu, timulikwetaga kwegesibwa muntu ondijo wena wena. Kayabatungire Mwoyo Mutakatifu akabegesa buli kantu, amazima, kitali kishuba. Nk'okwo yabegesize orwo yabatungire Mwoyo Mutakatifu, mpaho mugume mujwangaine nawe. 28Mbwenu inywe twana twange, mugume mujwangane na Kirisito, aho k'aliija tutalikwatwa nshoni, tugire obwesige bungi mara tumanzare tumugobe. 29Kamuraba nimumanya okwo aba mugorogoki, mumanyire kimoi okwo buli omoi akorage aba mwanawe.

will be added

X\