1 ABAKORINTO 7

1Aha byo mwampandikiire: Kirungi omushaija kutakora aha mukazi. 2Kyonkai aha rw'enshonga y'ekilengeso ky'obujanga, buli mushaija naragirwa kugira omukazi, na buli mukazi agire omushaija. 3Omushaija ahe omukaziwe ehaki z'obushwere, kutyo n'omukazi abe nikwo akolera mushaijawe. 4Omukazi tageleera mubiligwe, shana nigugeleerwa mushaijawe. Kutyo n'omushaija tagelera mubiligwe, shana nigugelerwa mukaziwe. 5Mutakwangirana, shana kuba mwikilijainyie aha rw'enshonga, mushobore kugira eibanga ly'okushoma enshara. Kyonkai mushube mube hamoi, Sitani ataija akabalengesa omu kulemwa kwetanga. 6Ningamba ntyo nk'alikubajubura, tindikubaragira. 7Nakwenzire abantu bona kushusha inye. Kyonkai buli muntu aina amatungwa age ago Ruhanga yamutungire, ogu aina ngeli egi n'ogu aina ngeli ndijo. 8Abatali mu bushwere n'entumbwa ningira nti kirungi ahali bonene omuntu kwikara wenkai nk'okwo inye ndikugira. 9Kyonkai kabatalikushobora kwetanga, bagire obushwere. Hakili kugira obushwere kushaaga obunyama kukukiza amani. 10Abaina obushwere nimbaragira: T'inye, ni Mukama, omukazi atataishukana na mushaija. 11(K'arakorakwo, aikare wenkai; kitali kityo bamutonganise na mushaijawe). N'omushaija atakutambya mukaziwe. 12Abasigaire n'inye ndikubagambira, ti Mukama: k'omukirisito wena wena araaba aina omukazi omutakansi, omukazi ogwo akaikiliza kutura nawe, omukirisito ogwo atakitambya mukazi ogu. 13K'omukazi wena wena araaba aina omushaija omutakansi, omushaija ogwo akaikiliza kutura nawe, omukirisitokazi ogwo atalisigaho mushaija ogu. 14Aha rw'okuba omushaija omutakansi, mukaziwe omukirisitokazi amuhindwire mutakatifu. N'omukazi omutakansi, mushaijawe omukrisito amuhindwire mutakatifu. Kabitakubaire bityo abaana banyu bakubaire bali batakansi, kyonkai mbwenu batakatifu. 15K'omushaija anga omukazi omutakansi yakugonza kutaishukana na mutahiwe, nikwo. Kabili biti omukirisito anga omukrisitokazi takomirwe. Aha rw'okuba Ruhanga naturagira katugira emilembe. 16Iwe mukazi nomanya otai nk'orarokora baro? Iwe mushaija nomanya otai nk'orarokora mukazi wawe? 17Ekiliho buli muntu arore oburora obw'Omukama yamuhaire, obwo yabaire narora orwo Ruhanga yamwesire. Eki ninkiragira omu nteko zona. 18Omuntu orwo yayesirwe akashangwa yatahiriirwe? Aleke kufa kubi n'okwesheleka okwo atatahirirwe. 19Okutahirirwa n'okutatahirirwa tibikwete kantu, ekishasize kwekomya emihango ya Ruhanga. 20Buli muntu aikare okwo yabaire ali orwo yayesirwe. 21Orwo wayesirwe okaba oli mwiru? Otafa kubi. Kyonkai k'oraba noshobora kubona obwegeleere, ohiige akashango. 22Araba yayesirwe ali mwiru kuhondera Omukama, ogwo ahali Mukama aina obwegeleere. Kutyo araba yayesirwe ali mwegeleere ogwo mwiru wa Kirisito. 23Mukagurwa eiguzi. Abantu batalibahindura bairu babo. 24Kityo barumuna bange, okwo buli omoi yabaire ali orwo yayesirwe, abe nikwo aikara atyo ahali Ruhanga. 25Inywe abatakataahire mu bushwere, tinyina kyo Mukama alikubahangira. Kyonkai nimbaha ebitekelezo byange, aha rw'okuba ndi mwesigwa aha rw'obuganyizi bw'Omukama. 26Nintekeleza nti aha rw'enshonga y'enaku eziliho kaanya aka, nimbona hakili omuntu aikare okwo ali. 27Oina omukazi? Otahiga kutaishukana nawe. Toina mukazi? Otagonza kushwera. 28Kyonkai k'orataaha omu bushwere tolikufakara. N'omwisiki k'arashwerwa talikufakara. Kyonkai kandi abarataaha omu bushwere obunyama bulibaita kubi, mara ekyo ninkibaganyiraho. 29Barumuna bange, ngondize kubagambira okwo akaanya akagambirwe kasigaire kake muno. Kuruga mwaha abaina abakazi barore nk'abatainabo. 30Abalikuchura bashushe abatalikuchura; abalikushanduuka bashushe abatalikushanduuka; abalikugura bashushe ababurwa eby'okugura; 31abalikuchwazikana n'ensi bashushe abatagyetaireho. Ensi egi okwo eyemire yahwaho. 32Tindikwenda kamuhwahwana. Omushaija atashweire nahwahwanisibwa eby'Omukama, okwo arashemeleza Omukama. 33Kyonkai omushaija ashweire nahwahwanisibwa eby'ensi, okwo arashemeleza mukaziwe, 34kityo nagira emitima ebili. Omukazi anga omwisiki atashweirwe nahwahwanisibwa eby'Omukama, okwo araba mutakatifu aha mwoyo n'aha mubili. Kyonkai omukazi omushwerwa nahwahwanisibwa ebintu by'ensi, okwo arashemeleza iba. 35Ebi nimbigamba aha rw'obuge bwanyu, ti aha rwa kubatega mutego. Ningonza kuboleka ebili birungi kushaaga, n'ebirabajuna kwekwata Omukama obuzira mitima ebili. 36K'omuntu araba nabona okwo alikushumashumwa kujangura omwisikiwe owo alikushelera, k'obunyama buraba nibumukiza amani, mara kandi taina kwo aragira, aho akore okwo alikwenda: Ashwere, baraba batakozire bufu. 37Kyonkai araaba atalikutengeta mu mutima, taina kimushasize mara nayetanga ekyo alikwenda, mara agendeleire ekigambo ekyo omu mutima, kwikara n'omwisikiwe atamushweire, araaba akozire kurungi. 38Alikushwera omwisikiwe owo ashelera nakorage; kyonkai alikweyanga obushwere ogwo nakorage kushaagaho. 39Omukazi taina kutaishuka ahali iba orwo iba akyarora. K'omushaija alikufa, omukazi mwegeleere kushwerwa owo arayenda, ekiliho Omukama abe nakisiima. 40Kyonkai omu miramulire yange, omukazi ogwo muberwa kushaaga kayakwikara okwo ali. Nikwo ndikubona, kandi nindenga nti nanye nyina mwoyo wa Ruhanga.

will be added

X\