1 ABAKORINTO 4

1Omuntu atukwate ati: Atubone tuli bakozi ba Kirisito mara bageleezi b'ebyebisho bya Ruhanga. 2Mara kandi abagelezi abaragiirwe kuba besigwa. 3Kyonkai inye mulikandamura anga ndikaramurwa rukiiko rwona rwona rwa bantu tinfireyo kantu n'akati. Nangu na inye nyenkai tindikweramura. 4Tinyinayo kyondikwebabara, kyonkai tikwo kugira nti ndi nyakatetere. Omukama n'iwe alikundamura. 5Aha rw'ekyo mutaramura kaanya katakagobire, Omukama atakaizire, n'iwe alileta aha mushana ebishelekire omu mwilima ashurure n'ebitekelezo by'emitima: Aho nirwo buli muntu alibona esiimiye ahali Ruhanga. 6Barumuna bange, nashoborora ebinkweteho inye na Apolo kamugasirwa, mushobore kutwegeraho kutashaaga aha bihandikirwe, mutaija mukagira eikuru kutungika ogu kandi kugaya olinya. 7N'ohai alikubona okwo ali muntu w'enshonga? Ni kihai eky'oinakyo ekyo otahairwe? Isi k'oraba wakihairwe buhaabwa, kubaki noyeshalingya okw'obon'oti tiwakihairwe? 8Mbwenu mwaigusire! Mwatungire! Mwabaire bakama obuzira ichwe! Isi nimube mwaba muli bakama kwo tukalya engoma na inywe! 9Nintekeleza nti ichwe omu ntumwa zona Ruhanga akaturonda tuli b'enzindo, tukaba nitushusha abantu ababaire baramwirwe kwitwa, aha rw'okuba ensi netutangalira, n'abamalaika n'abantu. 10Tuli bafano nituzira Kirisito, kyonkai inywe omuli Kirisito muli bamanyi. Tuli bajege, kyonkai inywe mwina amani. Inywe nibabakunira, kyonkai ichwe nibatugaya. 11Kulemwa kugoba saa egi twina enjara n'eiliho, titwina kakujwara, nituterwa empi, titwina buturo, 12nitufa nitwosha: Emilimo nitwekolera. Kabalikutujuma tubagambage. Kabalikutuboyera tubitekanira. 13Kabalikutuhangilira titulikurakaana. Kugoba mwaha tuli jagata omu nsi egi, nitushusha ekomboto y'ebintu byona. 14Tindikuhandika ebi kubashonaza, nimbihandika kubahana, muli baana bange abagonzibwa. 15Mulikaba mwina 10,000 ab'okubahabura omuli Kirisito, timwina baisheinywe bangi. Inye nkaba isheinywe omuli Kirisito kwema orwo nabarangiire evangeli. 16Aha rw'ekyo nimbatagiliza mundondore. 17Nikyo nabatwekeleire Timotheo, omwana wange omugonzibwa mara omwesigwa omuli Mukama. Wenene arabaijukya entwaza zange omuli Kirisito, nk'okwo ndikuzegesa buli hantu omuli buli nteko. 18Abandi omuli inywe abaina eikuru, nibalenga ngu tinyije wanyu. 19Kyonkai ndi haihi kubagobaho k'Omukama arasinga. Tindikwija kuhiiga eby'abeikuru aba balikugamba, ningonza kubona amani gabo. 20Aha rw'okuba obukama bwa Ruhanga tiburuga mu bigambo, buruga omu mani. 21Nimwendaki? Mbaizire n'enkoni anga mbaizire n'engonzi n'omwoyo gw'obuchulezi?

will be added

X\