1 ABAKORINTO 3

1Barumuna bange, inye tinashoboire kubafumolera nk'abantu abaina Mwoyo, shana nk'abantu b'ensi; kuba omuli Kirisito muli nk'enkelemeke. 2Nkabagambira amata, tinabahaire kyakulya kilikuguma, ahakuba mukaba mutakakishoboire; nangu na mwaha timukakishoboire, 3orwo mukyali bantu b'ensi. Kamulikugilirangana eihagiko n'okurwana, aho timuli bantu ba nsi, mara nimurora nk'abantu bona? 4Enshonga k'omuntu alikugamba ati, «Inye ndi wa Paulo,» ondijo ati, «Inye ndi wa Apolo,» timulikurora nka bantu b'ensi? 5Apolo ogwo yab'ohai? Paulo yab'ohai? Bairu ababaleteire okwesiga, buli omoi kuhondera amatungwa ag'Omukama yamutungire. 6Inye nkabyara, Apolo yaitiilira amaizi, kyonkai Ruhanga n'iwe yabikulize. 7Kityo alikubyara n'alikwitilira amaizi tibaina nshonga, shana olinya abimeza. N'iwe Ruhanga. 8Abyara n'aitilira amaizi nibaigana, mara buli omoi alibona emperwaye kuhondera eikoralye. 9Aha rw'okuba tuli bakozi ba Ruhanga; inywe muli ndimiroye; muli njuye. 10Nk'okwo omugisha ogwo Ruhanga yantungire guli, nkombeka omusingi okw'obona omwombeki omubuya; ondijo yayombeka ahali gwonene. Kyonkai buli omoi alebe okwo alikukyombekaho. 11Taliho yakwombeka musingi gundi, gutali ogwo ogwayombekirwe, n'iwe Yesu Kirisito. 12Kyonkai aha kitebe ekyo k'omuntu arayombekesaho ezahabu anga efeza anga amabare g'eiguzi anga emiti anga obunyasi, 13omulimo gwa buli muntu guligya aha mushana. Ekiro ky'Omukama kiliguzora, nobona omulimo ogwo gulizorwa omuliro, n'omuliro gulizora omulimo ogwo buli omoi yakozire gwemire gutai. 14Enju eyo kaishe muntu ayombekire aha musingi eliikaraho, alibona emperwa. 15K'enju ya buli muntu elihya ekabutama, aliterwa ehasara, n'orwosi wenene alirokoka, kyonkai alishusha ayaraba omu muliro. 16Timulikumanya okwo inywe muli Rwensinga ya Ruhanga, mara Mwoyo wa Ruhanga asingiire omuli inywe? 17K'omuntu wena wena alikambura Rwensinga ya Ruhanga, Ruhanga alimukambura. Rwensinga ya Ruhanga eba ntakatifu, mara Rwensinga egyo n'inywe. 18Omuntu n'omoi atakwebeiya. K'omuntu wena wena omuli inywe araba nayetekeleza kuba mumanyi omu nsi egi, abe mufera aije abone kuba mumanyi. 19Obumanyi bw'ensi egi ahali Ruhanga nibwo bufera. Nobona kikahandiikwa kiti, «Abamanyi abakwatira omu bwenge bwabo,» 20kandi, «Omukama namanya okwo ebitekelezo by'abamanyi bitaina kantu.» 21Kityo omuntu atalyebuga bantu. Ebintu byona byanyu, 22alikaba Paulo anga Apolo anga Kefa anga nsi anga burora anga rufu anga obukiro obwo tuliho anga obukiro obulija, byona byanyu; 23na inywe muli ba Kirisito; kandi Kirisito wa Ruhanga.

will be added

X\