1 ABAKORINTO 2

1Barumuna bange, orwo naizire owanyu kubarangira ekyebisho kya Ruhanga, tinakolize migambire elikuguma anga bumanyi bungi. 2Ekyo nabaire nimpiga ahali inywe ti kindi shana Yesu Kirisito ogwo ayabambirwe. 3Orwo twabaire tuli hamoi nkaba ndi mujege, nintina mara ninjugumba. 4Emigambire yange n'ebyo nagambire bikaba bitali bigambo bya kutangaza eby'obumanyi. Ekiliho bikaba nibyolekya amani ga Mwoyo Mutakatifu, 5okwikiliza kwanyu kuleke kusimbagiliza aha bumanyi bw'abantu, kusimbagilize aha mani ga Ruhanga. 6Obumanyi bwa Ruhanga tubugambira ab'emyoyo ekuzire, kyonkai buba butali bumanyi bwa nsi egi anga obw'abatwazi bayo banyakufa. 7Tugamba obumanyi bwa Ruhanga obushelekire obutalikumanyika, obwo Ruhanga yataireho ensi etakabaireho twije tuhabwe ekitinwa. 8Taliho mutwazi wa nsi egi ayashobokeirwe bumanyi obu: aha rw'okuba kabakubumanyire tibakubambire Mukama wa kitinwa. 9Kyonkai nk'owo kyahandikirwe kiti: «Ekyo eliisho litakabonaga, n'okutwi kutakahuliraga, n'omuntu takakitekelezaga mu mwoyo, ekyo Ruhanga yatekatekeire aba abamugonza.» 10Ruhanga akatushurulira ekigambo eki omu bushobora bwa Mwoyo. Nobona Mwoyo ahenjuza buli kantu, nangu n'eby'ebisho by'amani ebikwete ahali Ruhanga. 11Ni muntuki amanya ebitekelezo by'omuntu gutali mwoyo ogw'omuntu ainagwo? Nikyo kimoi, taliho amanya byebisho bya Ruhanga, shana Mwoyo wa Ruhanga. 12Kandi ichwe mwoyo owo twahairwe ti wa nsi egi, shana Mwoyo aruga ahali Ruhanga, tubone kushobokerwa amatungwa ago Ruhanga wenene yatutungire. 13Mara amatungwa ago titulikugashoboroza rulimi orwo twayegesiibwe bumanyi bwa bantu. Nitukoza orulimi orwo twayegesiibwe Mwoyo, eby'omwoyo nitubishoborora abaina Mwoyo. 14Omuntu alikuhondera obunyama tatungwa matungwa ga Mwoyo wa Ruhanga, kuba ebyo bimubera by'obulenga, mara taina kubishobokerwa, aha rw'okuba bishoboka buli bushobora bwa Mwoyo. 15Omuntu alikuhondera eby'omwoyo ashobokerwa buli kantu, kandi wenene taliho amushobokerwa. 16Ebihandiko nibigamba biti, «N'ohai aramanyire ebitekelezo bya Ruhanga, kugir'oti arayegesa Ruhanga?» Kyonkai ichwe ebitekelezo bya Kirisito nitubimanya.

will be added

X\