1 ABAKORINTO 15

1Barumuna bange, nimbaijukya evangeli eyo nabarangiire, eyo mwakunzire mara mugyemeleremu, 2niyo elikubarokora kamuragyekwata nk'okwo nagibarangiire, shana kamuraba mwafire kwikiliza bushai. 3Nkabaha eby'omugasho gw'amani ebyo nanye nahairwe, okwo Kirisito yafire kwiza amafu gaitu kuhondera ebihandiko; 4okwo yaziikirwe, akahimbuka aha kiro kya kashatu nk'okwo ebihandiiko bilikugamba, 5yahabukira Kefa yashuba yahabukira n'eikumi na babili. 6Yamara yahabukira n'abegesibwa abalikushaga 500 omu kaanya kamoi, abangi muno omuli abo bakyarora n'orwo abandi bafire. 7Akashuba yahabukira Yakobo, ahanyuma yahabukira entumwa zona. 8Kayabaire yahabukiire bona yahabukira nanye, ayabaire nashusha omuntu ayazairwe atagobire. 9Inye omu ntumwa ndi muke muno, tindagiirwe kwetwa ntumwa, aha rw'okuba nkagingiza enteko ya Ruhanga. 10Kyonkai omu mani g'ekisha kya Ruhanga ndi okwo ndi, mara ekishakye ahali inye tikyafire bushai. Eky'okutangaza nkozire n'amani kubashaaga bona, n'orwo abaire atali inye, shana ekisha kya Ruhanga nikyo kibaire kinyemiremu. 11Alikaba abaire ali inye anga bonene, ebigambo ebyo nibyo tulikuranga, mara ebigambo ebyo nibyo mulikwikiliza. 12Mbwenu katuraba nituranga okwo Kirisito yahimbukire omu bafu, aho omuli inywe abandi bakugamba batai okwo okuhimbuka kw'abafu kutabayo? 13K'okuhimbuka kw'abafu kuraba kutabayo, ahonu Kirisito tiyahimbukire. 14Ka Kirisito araba atahimbukire, aho okuranga kwaitu kwa bushai, n'okwikiliza kwanyu kwa bushai. 15Nangu nituzoka Ruhanga nitumujuliza ebishuba, tukagamba okwo yahimbwire Kirisito, owo atahimbwire kakiraba kilikwo kugamba okwo abafu tibahimbuka. 16K'abafu baraba batahimbuka ahonu Kirisito tiyahimbukire. 17Ka Kirisito araba atahimbukire, okwikiliza kwanyu tikwina nshonga, mara mukyali omu mafu ganyu. 18Na balinya abafire bajwangaine na Kirisito basilikire. 19Katuraba twina eshuubi omuli Kirisito aha rw'oburora obu bwonkai, tuli b'okuganyibwa kushaaga abantu abandi bona. 20Kyonkai omu mazima Kirisito akahimbukakwo omu bafu, n'iwe shuubi y'abafire. 21Nk'okwo orufu rwalesirwe omuntu omoi, nikwo n'okuhimbuka omu bafu kwalesirwe omuntu omoi. 22Nk'okwo abantu bona bafa nibazira Adamu, nikwo abantu bona balihimburwa omu mani ga Kirisito. 23Kyonkai buli omoi omu mwanya ogwe: Kirisito n'iwe muhimbuke wa mbere, kandi abalibe bahondereho orwo aliija. 24Aho gabe maheleruka orwo Kirisito aliheleza Ruhanga Ishe obukama orwo aliba yamazire kusilikya abakama bona, n'ab'obushobora n'amani. 25Wenene n'iwe aliba mutwazi alemwe abe mukama w'ababisha ba wenene bona. 26Omubisha alisilika ali w'enzindo ni rufu. 27Ruhanga akakwasa Kirisito ebintu byona k'abigeleera. Kyonkai kabalikugamba okwo ebintu byona bigire omu bushobora bwa Kirisito, nikimanyikage okwo Ruhanga alikubiteka omu bushoborabwe talikugambwa. 28Orwo byona biliba byagiire omu bushobora bwa Kirisito, aho Mwana aligya omu bushobora bwa Ruhanga, ayataire ebintu byona omu bushobora bwa Mwana, Ruhanga ashobore kutwalira kimoi ebintu byona. 29Kakitali kityo abantu bagendeleraki kubatizibwa aha rw'abafire? K'abafu baraba batahimbuka n'akake, kubaki abantu babatizibwa aha rwabo? 30Kubaki buli saa ndi omu kabi? 31Nayanga, barumuna bange: Aha rw'okubebuga kwange okwo mbebuga omuli Kirisito Yesu Omukama waitu, ninfa buli kiro! 32Omu migambire y'obuntu nakugasiirweki kanakubaire narwaine n'ebigunju bya Efeso? K'abafu baraba batahimbuka ahonu tulye, tunywe, kuba nyenkya nitwija kufa. 33Muleke kwebeiya: Ekisimba kibi kiita engesho zirungi. 34Mweshubeho, mulekere kufakara. Abandi Ruhanga tibalikumumanya. Ky'enshoni kubona nimbagambira ebigambo ebi. 35Kyonkai haliho arabaza ati, «Abafu bahimbuka batai? Bahimbuka baina mubili gwa ngeliki?» 36Iwe mufano! Eky'obiba tikihimbuka kitafire. 37Eky'obiba tobiba mubili ogulizarwa, obiba embibo yonkai, rundi y'engano anga ya mwaka gundi. 38Kyonkai Ruhanga agiha omubili nk'okwo alikwenda. Buli mbibo nagiha omubili ogwayo. 39Emibili yona teshushana. Engeli y'abantu eyeshana, ey'ebigunju eli hayo, ey'ebinyonyi hayo, n'ey'enfuru hayo. 40Haliho emibili ey'omw'iguru, haliho n'emibili ey'omu nsi. Kyonkai ekitinwa eky'ey'omw'iguru kili hakyo, n'ekitiinwa eky'ey'ensi kili hakyo. 41Eizoba ligira kitinwa kyalyo, n'okwezi kugira kitinwa wakwo, n'enyanyinyi kitinwa kyazo; nobona enyanyinyi zigira enshororo omu kitinwa. 42Nikwo n'okuhimbuka kw'abafire kuli. Ekikabibwa kihwaho, ekihimbuka tikihwaho. 43Embibo omu kubibwa kwayo ziba nshoni, kyonkai eija ehimbuka omu kitinwa. K'ebibwa eburwa amani, kyonkai k'ehimbuka egira amani. 44Ebibwa eina omubili nyabubili, ehimbuka eina omubilimwoyo. Ka haraba habaho omubili nyabubili, n'omubilimwoyo gubayo. 45Oku nikwo kyahandikirwe, kiti, «Adamu n'iwe yabaire muntu wa mbere ow'omwoyo gw'oburora;» Adamu owa nyuma ogwo yagira oburora. 46Kyonkai Adamu owa mbere t'ogu omugizi w'oburora. Owa mbere n'olinya nyakufa, owa nyuma n'ahonderaho. 47Omuntu owa mbere akaruga omw'itaka, ni rwaibumba; omuntu owa kabili akaruga omw'iguru. 48Nk'okwo rwaibumba yabaire ali, kutyo nikwo na barwaibumba bona bali. Kandi nk'okwo ayarugire omw'iguru yabaire ali, kutyo nikwo n'abali b'eiguru bali. 49Nk'okwo tulikushusha rwaibumba, kwakwo nikwo tulishusha n'ayarugire omw'iguru. 50Eki ninkibagambira barumuna bange: Nyakufa taina kutaaha mu bukama bwa Ruhanga; nyakufa tiyakubona nyakumeleera. 51Inywe! Kambagambire ekyebisho. Titulikwija kufa ichwena; ekiliho ichwena nitwija kuhinduka kushai, 52omu kaanya kagufi, omw'ipokya n'eiburura, orwo enzamba y'enzindo erataaga. Nobona enzamba erataaga, abafu bahimbuke obutashuba kufa rundi, mara tuhinduke. 53Omubili ogu nyakufa guragiirwe kuhinduka gukameleera; omubili ogulikushobora kufa gube gutakifa. 54Omubili ogu nyakufa orwo guraba gutakifa gukamelera, aho kigobelere ekyahandikirwe kiti: «Rufu yasingwa ekunekune. 55Iwe rufu, wasingaki? Iwe rufu, orubuli rwawe rundage!» 56Obufu nirwo ruba rubuli rwa rufu; kandi amani g'obufu gazarukana omu Mateka. 57Kyonkai Ruhanga nakasinge ayatuhaire okusinga omu mani g'Omukama waitu Yesu Kirisito. 58Aha rw'ekyo barumuna bange abagonzibwa, mugume, mutashegenyuka, mwikare aha rubimbi orw'Omukama yabainikireho, mumanye okwo ebyo mulikukolera Omukama bitalifa kushai.

will be added

X\