1 ABAKORINTO 13

1N'orwo nakugamba endimi z'abantu nangu n'ez'abamalaika, kantaina ngonzi ninshusha omulinga gulikujuga anga enkunturo elikugamba. 2Kandi n'orwo nakugira amani g'oburangi, nkashobokerwa n'ebyebisho byona n'obumanyi bwona, nangu nkagira okwesiga okumaliliire kugoba aha kufurura amabanga, kantaina ngonzi nimba ntaina mugasho. 3Kanakugaba byona ebyo nyinabyo, nkahayo n'omubili gwange kabagwokya, kantaina ngonzi nimba ntaina mugasho. 4Engonzi zigira obwegumisiliza n'obufura; engonzi tizigira ihagiko anga kwetungunika. 5Tizigira ikuru handiki kweyemya kubi. Engonzi tizikora byo zonene zonkai zayenda; tizitamwa bwangu handiki kwefuuhya. 6Ebili bibi tizibishemelerwa, shana zishemelerwa ebili birungi. 7Engonzi zemera buli kantu, zesiga buli kantu, zigira eshuubi omuli buli kantu, zegumisiliza buli kantu. 8Engonzi tizilichweka. Oburangi bulihwaho; okugamba endimi kulilekera; n'obumanyi bulihwaho. 9Ahakuba obumanyi obwaitu tibuhikiliire, n'oburungi bwaitu tibugobeleire. 10Kyonkai orwo ekihikilire kilimara kwija, ekitahikiliire kilihwaho. 11Orwo nabaire ndi mwana, nagambaga nk'omwana, natekelezaga nk'omwana, nabonaga nk'omwana. Kanakuzire eby'obwana nabilekera. 12Mbwenu aha nitubona ekituliizi omu kyoo. Ahanyuma tulibona bubona. Kaanya aka nimbona ekichweka; kyonkai ahanyuma ndishobokerwa obwiziizi, nk'okwo Ruhanga alikunshobokerwa obwiziizi. 13Kityo ebishatu ebi bigumaho, okwesiga, eshuubi n'engonzi. Kyonkai omuli ebi ekikuru kushaaga byona ngonzi.

will be added

X\