1 ABAKORINTO 12

1Barumuna bange, aha bikwete aha matungwa g'omwoyo ningonza mubimanye. 2Nimumanya okwo orwo mwabaire muli batakansi mwahabaga mugya aha bihuuku ebitita, nk'okwo mwahabaga rwona rwona. 3Kityo ningonza mushobokerwe okwo hatabayo muntu agamba mu bushobora bwa Mwoyo wa Ruhanga aziza kugamba ati, «Yesu n'akaraamwe!» Kandi taliho yakugamba ati, «Yesu aba Mukama» shana abe ayemirwemu Mwoyo Mutakatifu. 4Amatungwa gali hangi, kyonkai Mwoyo ali omoi. 5Eikora lili hangi, kyonkai Omukama omoi. 6Emilimo nayo eina engeli zingi, kyonkai yona Ruhanga n'iwe wenene wenene alikugikyanulira abantu bona. 7Buli muntu ashurulirwa amatungwa ga Mwoyo kugasira abantu bona. 8Haliho owo Mwoyo alikutunga eby'okugamba obumanyi; ondijo namutunga okugamba eby'amagezi omu bushobora bwa Mwoyo wenene wenene. 9Ondijo Mwoyo wenene namutunga okwesiga, ondijo namutunga amatungwa g'okukiza, 10ondijo namutunga okukora ebitangazo, ondijo namutunga oburangi, ondijo namutunga okwahurana amatungwa agalikuruga ahali Mwoyo n'agatalikwo, ondijo namutunga okumanya endimi za nyakalimi, ondijo namutunga okushoboorora endimi. 11Ebi byona nibabikyanulirwa Mwoyo wenene ogwo omoi, n'iwe agabira buli muntu nk'okwo ayenda. 12Nk'okwo omubili guli gumoi kyonkai engingo zagwo zili zingi, n'engingo zona z'omubili, n'orwo zili zingi, zili mubili gumoi, nikwo na Kirisito ali. 13Omu mani ga Mwoyo omoi ichwena nitubatizibwa kuba mubili gumoi: Tube Bayahudi anga abatali Bayahudi, tube bairu anga begeleere, ichwena tukahabwa Mwoyo omoi n'iwe tunywaho. 14Omubili tigugira rugingo rumoi, gugira engingo zingi. 15K'ekilenge kyakugizire kiti, «Orwo inye ntali kiganja tindi wa mubili,» ekyo tikyakukihindwire kutaba rugingo rwa mubili. 16N'okutwi kakwakugambire kuti, «Orwo ntali liisho tindi wa mubili,» ekyo tikyakukihindwire kutaba rugingo rwa mubili. 17K'omubili gwona gwakubaire liisho, aho omubili gwakuhuliire gutai? K'omubili gwona gwakubaire kutwi, aho omubili gwakunukiirwe gutai? 18Ekiliho, Ruhanga akata engingo omu mubili, buli rugingo nk'okwo araba yayenzire. 19K'engingo zona zakubaire rugingo rumoi, aho omubili gwakugiire nkahai? 20Nk'okwo kili engingo zili zingi kyonkai omubili gumoi. 21Eliisho tilyakugambira kiganja liti, «Iwe, inye tindikukwetaga,» handiki omutwe kugambira kilenge guti, «Iwe, inye tindikukwetaga.» 22Nangu kandi engingo z'omubili eziboneka kugira amani gake bwoli nizo zetaagwa muno, 23kandi engingo ez'omubili ezo tugayamu nizo tukunira kushaaga, kandi engingo zaitu ez'enshoni nizo tujwekage kushaagaho, 24kyonkai ezitali za nshoni tizetaaga kujwekwa zityo. Ruhanga akateranisa engingo omu mubili gumoi, orugingo orutaina kitinwa yaba nirwo aha ekitiinwa ekishagireho, 25omu mubili hataija hakabamu ndwano, engingo zona zishobokerwangane. 26K'orugingo rumoi rushasha, engingo zona zishasha hamoi. K'orugingo rumoi ruhaabwa ekitiinwa, engingo zona zishanduka hamoi. 27Mbwenu inywe muli mubili gwa Kirisito, mara buli omoi rugingo rw'omubili ogwo. 28Nikwo na Ruhanga omu nteko yatairemu entumwa, abo ba mbere; aba kabili barangi, aba kashatu begesa, aho ahonderwaho abakozi b'ebitangazo, abatambi, abahwezi, abatwazi n'ababuya b'endimi zitali zimoi. 29Bona ntumwa? Bona barangi? Bona begesa? Bona nibakora ebitangazo? 30Bona baina amatungwa g'okutamba? Bona nibagamba endimi? Isi bona nibashoborora endimi ezo? 31Ekiliho mwitanire amatungwa agalikukira muno oburungi. Mbwenu mboleke omuhanda ogurungi kukiraho.

will be added

X\