1 ABAKORINTO 11

1Mundondore nk'okwo inye ndikurondora Kirisito. 2Nimbasiima aha rw'okunyijuka omuli byona n'okwekomya emigenzo nk'okwo nk'agibegesize. 3Kyonkai ningonza mushobokerwe okwo Kirisito n'iwe aba mutwe gwa buli mushaija. Omutwe gw'omukazi aba mushaijawe; n'omutwe gwa Kirisito ni Ruhanga. 4Buli mushaija ashoma enshara anga akabaasha ayebunzire omutwe aba nakunukuruza Kirisito, omutwegwe. 5Kyonkai kaishe mukazi ashoma enshara anga akabaasha atajwete kihundwi aba nakunukuruza mushaijawe, omutwegwe; nikyo kimoi nk'okwo yakuba amoisize eishoke. 6K'omukazi araba atayetaireho kihundwi, aho eishoke alishare. Kyonkai kakiraba kili kihemu omukazi kusharwa eishoke, ahonu ayeteho ekihundwi. 7Omushaija atayebunda mutwe, aha rw'okuba aba nshusho ya Ruhanga mara kitinwakye. 8(Nobona omushaija tiyazarukaine mu mukazi; omukazi n'iwe yazarukaine omu mushaija. 9Nangu kugir'oti omushaija akatondwa aha rw'omukazi; omukazi n'iwe yatonzirwe aha rw'omushaija.) 10Niyo nshonga omukazi naragirwa kuteka ekihundwi aha mutwe aha rw'abamalaika. 11(Kyonkai omu mibonere y'Omukama omukazi tiyakubaho hataliho mushaija, n'omushaija tiyakubaho hataliho mukazi. 12Nk'okwo omukazi yazarukaine omu mushaija, nikwo n'omushaija azarwa omukazi; mara ebintu byona biruga ahali Ruhanga.) 13Nainywe mulebe; omukazi kushoma enshara ahali Ruhanga ataina kihundwi aha mutwe, nikija? 14Nangu n'obuhangwa nibuboleka okwo kili ky'enshoni aha mushaija kulera eishoke. 15Kandi omukazi kulera eishoke akatimake nikaba kezire. 16K'omuntu araba nahakana, ichwe egi niyo ntwaza yaitu, mara ntwaza y'enteko za Ruhanga. 17Omu byo ndikwija kubagambira tindikwija kubasiima, kuba orwo mulikuterana timulikugya mu maisho shana kushuba enyuma. 18Ekya mbere nimpulira ngu orwo mulikuterana muli nteko nimugiramu okutanukana. Ekyo orubaju ninyikiliza okwo kilikwo, 19aha rw'okuba okutanukana kusaine kubaho omuli inywe, nirwo balinya abalikukora ebisaine baramanyika. 20Orwo mulikuterana ekyo mulikuraagira ti kyakulya kya Mukama. 21Aha rw'enshonga orwo mulikulya, buli omoi nabanza kweliira, kandi okwo ogu narumwa enjara, ondijo atamiire. 22Ekyo kiki? Timwina maju ga kuliiramu mukanyweramu? Anga nimugaya enteko ya Ruhanga n'okukwasa enshoni abataina kantu? Mbagambireki? Mbasiimireki? Chei, tindikubasiima. 23Eky'Omukama yanyegesize nikyo na inywe nabegesize: Okwo Omukama Yesu omu kiro kyo yabanjwa akakwata omukate, 24kayamazire kusiima yagubegura, yagamba ati, «Ogu mubili gwange aha rwanyu. Mukorega mutyo kunyijukiraho.» 25Omu migilire yonene yonene kayamazire kuraagira kwakwo akwata ekikompe, agamba ati, «Ekikompe eki ndagano empya aha rw'obwamba bwange, buli orwo murakinywagaho mukorega mutyo okunyijuka.» 26Aha rw'okuba buli orwo muralyaga omukate ogu, n'okunywa aha kikompe eki, murabaga nimuranga okufa kw'Omukama kuhika orwo aliija. 27Aha rw'ekyo arakalyaga omukate ogu n'okunywa aha kikompe ky'Omukama atasaniire, arakwatwaga omushango gw'okuhagaza omubili gw'Omukama n'obwambabwe. 28Kityo omuntu abanze ayelebe, nirwo aralya omukate n'okunywa n'aha kikompe. 29Omuntu alikulya omubili ogu akashuba akanywa atasaniire, naba nakor'atyo kweletera omushango. 30Nikyo kileteire bangi omuli inywe okugira amani gabi n'okurwara; kandi n'abandi bafire. 31Katwakweramwire omu mazima, titwakuramwirwe. 32Kyonkai k'Omukama alikuturamura, aho nituhaabwa n'ekibonabonyio tutaija tukaramuliranwa na nsi. 33Mbwenu aho barumuna bange, orwo mulikuterana kulya, mulindangane. 34K'omuntu araba aina enjara alye omuka, muleke kuterana kweletera omushango. Ebyasigara ndabibahaburaho orwo ndaija.

will be added

X\