1 ABAKORINTO 10

1Barumuna bange, ningoza mumanye okwo batataichwe balindwaga ekichwi, mara bona bakaraba omu nyanja. 2Bakabatilizibwa omu kichwi n'omu nyanja, baba ba Musa. 3Bona bakalya ekyakulya ky'omwoyo, 4mara banywa eky'okunywa kimoi ky'omwoyo. Banywaga aha Rwazi rw'omwoyo orwabarugaga enyuma, mara orwazi orwo yabaga Kirisito. 5Kyonkai abali bangi muno Ruhanga tiyabashemeleirwe, bakagwa omw'irungu. 6Mbwenu ebintu ebi bitutatire, tuleke kugonza okufakara nk'okwo bagizire. 7Muleke kufukamira ebihuuku nk'okwo bonene bagizire. Okwo kyahandikirwe kiti, «Abantu bakashuntama balya banywa, baimuka bazina.» 8Tulekere obusiyani obwo abandi bagiraga, nangu abantu nka 23,000 bakafa ekiro kimoi. 9Tuleke kulengesa Omukama nk'okwo abandi bagizire bakaija bakaitwa enjoka. 10Kandi mutakweboroboita nk'okwo abandi bagizire, omusiliikya akaija akabasilikya. 11Ebi bikababaho k'abandi bamanyiraho, kandi byahandikwa kutwegesa ab'ensi elikwija kuhelerukiraho. 12Kityo araba natekeleza okwo ayemeleire ayelinde atakugwa. 13Taliho kilengeso kirabaiziire ekitali kya bantu bona. Ruhanga aba mwesigwa, talikwija kubanagirana kulengesibwa kushaaga okwo amani ganyu gali. Omu bilengeso arabaha omuhanda gw'okubirugamu, mushobore kubyegumisiliza. 14Aha rw'ekyo bagonzibwa bange, mulekere okufukamira ebihuuku. 15Ningambira abantu abainamu amagezi; inywe mushobokerwe ekyo ndikugamba. 16Ekikompe kitakatifu ekyo tulikusiimira Omukama: katulikukinywaho titulikunywa bwamba bwa Kirisito? Omukate ogwo tulikubegura, titulikulya mubili gwa Kirisito? 17Okw'omukate guli gumoi, naichwe abali bangi tuli mubili gumoi aha rw'enshonga ichwena nitulya omukate gumoi. 18Mulebe Abaisiraeli: Abalikulya ebitambo tibalikuba babitambiire Ruhanga ahali alutare? 19Mbwenu aho ningonza kugambaki? Ningonza kugamba okwo ebyakulya ebyo bahongera ebihuuku bin'enshonga, anga okwo ekihuuku kiina omugasho? 20Chei, ngondize kugamba okwo ebyo abatakansi batamba babihongera amasitani, tibabihongera Ruhanga. Tindikubendera kulya na masitani. 21Timwakunywa aha kikompe kya Mukama mukashuba mukanywa aha kikompe ky'amasitani. Timwakulya aha meza ya Mukama mukashuba mukalya aha meza y'amasitani. 22Tugize Omukama eibuba? Nitumushaagya amani? 23«Ebintu byona birungi,» kyonkai ti bintu byona biina mugasho. Ebintu byona nibijuburwa, kyonkai ti bintu byona byombeka. 24Omuntu atahiiga buge bwa wenene, ahiige obuge bwa mutahiwe. 25Ebilikuguzibwa omu masoko g'enyama mwakubilya mutafire kubi kubaza ishenkazi omutima. 26Aha rw'okuba «Ensi eba y'Omukama hamoi n'ebikagilimu.» 27K'omutakansi arabaraliza kulya omwa wenene mukagyayo, kyona kyona ekyo arabateka omu maisho mulye mutafire kubi kubaza ishenkazi omutima. 28(Kyonkai k'omuntu yakubagambira ati, «Enyama egi yaruga aha kitambo,» mutagilya aha rw'ogwo ayabamanyisa, n'aha rwa ishenkazi omutima. 29Kandikugamba nti, «Aha rwa ishenkazi omutima» ningamba wenene, t'inywe). Kubaki ekyo ndikwenda nkitangwe okutinatina kw'ondijo? 30Kandalya ninsiima, kubaki bandwanise aha rw'ekyakulya ekyo ndikusiimira? 31Kityo muraba nimulya anga nimunywa, handiki mube nimukoraki, byona ebyo mubikore nimusingiza Omukama. 32Mutakutamisa Bayahudi anga Bagiriki anga enteko ya Ruhanga, 33nk'okwo inye ndikushemeleza abantu bona omuli buli kimoi ekyo ndikukora, ntalikuhiga buge bwange shana aha bwa bangi, babone kurokoka.

will be added

X\