1 ABAKORINTO 1

1Inye Paulo, owo Ruhanga yayenzire kanyetwa ntumwa ya Yesu Kirisito, na murumuna waitu Sositenesi, 2nitubahandikira inywe enteko ya Ruhanga eya Korinto. Inywe mukahindurwa batakatifu omuli Yesu Kirisito, mwayetwa kuba batakatifu hamoi na bona abali buli hantu nibashoma enshara kutakira Omukama waitu Yesu Kirisito Mukama, wabo kandi Mukama waitu. 3Ruhanga Isheichwe n'Omukama waitu Yesu Kirisito babatunge ekisha n'emilembe. 4Buli kaanya nimbasiimira Ruhanga aha rw'omugisha ogwo yabatungire aha rwa Yesu Kirisito. 5Aha rw'enshonga y'omujwangano gwanyu na Kirisito mubaire batungi omuli byona, ebyo mulikugamba byona n'ebyo mulikumanya byona bibulimu. 6Ebyo mwagambiirwe nk'obujulizi ahali Kirisito byahamire bwoli omuli inywe 7mwabona buli matungwa g'omwoyo, oku muliho mutegeleize okuhabuka kw'Omukama waitu Yesu Kirisito. 8Wenene n'iwe alibagumisa mukaikara muli nyakatetere kuturuka aha nzindo aha kiro ky'Omukama waitu Yesu Kirisito. 9Ruhanga ayabesire kamujwangana n'Omwanawe Yesu Kirisito Omukama waitu, aba mwesigwa. 10Barumuna bange, nimbatagiliza mbataireho Omukama waitu Yesu Kirisito, inywena mugambe kimoi mara mutatanukana. Mutegeke kimoi, mutekeleze kimoi. 11Ab'omwa Koloe bangambiire okwo mwinamu empaka, inywe barumuna bange. 12Ngondize kubagambira okwo buli omoi omuli inywe akwese «Inye ndi wa Paulo,» anga, «Inye ndi wa Apolo,» anga, «Inye ndi wa Kefa,» anga, «Inye ndi wa Kirisito.» 13Isi Kirisito arugirwemu ebichweka? Isi Paulo akabambwa kubarokora? Isi mukabatizibwa omw'ibara lya Paulo? 14Ninsiima Ruhanga kubona ntabatiize n'omoi omuli inywe shana Kirisipo na Gayo; 15omuntu ataija akagira ati mukabatizibwa omw'ibara lyange. 16(Kwakwo nkabatiza n'omutungo gwa Sitefana. Kitali kityo tindikumanya nka nyina owo nabatiize wena wena.) 17Kirisito tiyantumire kubatiza shana kuranga evangeli, kutali kugambisa bumanyi, omusaraba gwa Yesu gutaija gukaburwa nshonga. 18Ebilikugambwa aha kufa kwa Yesu aha musaraba, bigambo by'obufera omu maisho g'abalikusiliika. Kyonkai ichwe abalikwitanira okurokoka nitubona okwo buli bushobora bwa Ruhanga. 19Kikahandikwa kiti, «Obumanyi bw'abamanyi ndibusinjagulikya, n'amagezi g'abagezi ndigaita.» 20Omumanyi alihai? Omwegi alihai? Omuhakani ow'amakiro aga alihai? Ruhanga tazoire okwo obumanyi bw'ensi buba bufera? 21Ruhanga omu bumanyi bwa wenene tiyakunzire bantu kushobora kumumanya aha rw'obumanyi obwabo nyabwabo. Ekiliho Ruhanga akagonza kurokora abo abalikwesiga, kubarokoza amakuru ago tulikuranga ago balikweta «G'obufera.» 22Abayahudi nibarumba obubonero, kandi Abagiriki nibarumba obumanyi. 23Kyonkai ichwe nituranga Kirisito ayabambirwe, ekisiitazo aha Bayahudi, kandi obulenga aha Abanyamahanga. 24Kyonkai aha baraaba besirwe, Abayahudi n'Abagiriki kumoi, Kirisito mani ga Ruhanga, bumanyi bwa Ruhanga. 25Ruhanga omu bulengabwe mumanyi kushaaga abantu. N'omu bujegebwe amani nagashagya abantu. 26Barumuna bange, mutekeleze aha mweto gwanyu. Omu mibere y'ensi ababaire bali bamanyi omuli inywe ti bangi, ti bangi ababaire baina bushobora, ti bangi ababaire nibaruga omu nganda z'abakama. 27Shanasi Ruhanga akaronda ab'ensi yabonaga bali bafera kushonaza abamanyi. Akaronda ab'ensi yabonaga bali bajege kushonaza ab'amani. 28Ruhanga akaronda abantu ab'ahansi abagaywa ensi, abazoka bali bintu kushai, abone kulibisa abebona bali b'omugasho, 29omuntu atalija akeshalingya omu mabona ga Ruhanga. 30Ruhanga n'iwe ntabuko y'oburora bwanyu omuli Yesu Kirisito owo yahindwire bumanyi bwaitu, bugorogoki bwaitu, butakatifu bwaitu mara kuchungurwa kwaitu. 31Nikyo bahandikire bati, «Araba nayebuga ayebuge Omukama.»

will be added

X\