Ezekyèl 39

1Seyè sèl Mèt la di ankò: -Nonm o! Bay mesaj mwen ba ou sou Gòg la. Wi, di li men mesaj mwen menm, Seyè sèl Mèt la, m’ voye ba li: Ou menm Gòg, pi gwo chèf moun Mechèk ak moun Toubal yo, m’ pral leve dèyè ou tou. 2M’ap fè ou pran yon lòt direksyon, m’ap fè ou soti nan pwent nò a, m’ap mennen ou sou mòn Izrayèl yo. 3Lè sa a, m’ap kraze bwa banza ki nan men gòch ou a. M’ap fè flèch yo soti tonbe nan men dwat ou. 4Ou menm Gòg, ansanm ak tout lame ou la ak tout lòt pèp k’ap mache avè ou yo, nou pral mouri sou mòn peyi Izrayèl la. M’ap kite kadav nou sèvi manje pou malfini karanklou, pou tout kalite zwezo ak bèt nan bwa. 5Nou pral mouri nan plenn yo. Se mwen menm, Seyè sèl Mèt la, ki pale. 6M’ap voye yon sèl dife nan peyi Magòg ak nan tout peyi bò lanmè kote moun t’ap viv san bri san kont lan. Tout moun va konnen se mwen menm ki Seyè a. 7Mwen pral fè tout moun nan pèp Izrayèl la konnen mwen gen yon non apa. Mwen p’ap kite yo trennen non mwen nan labou ankò. Lè sa a nasyon yo va konnen mwen menm, Seyè a, ki Bondye pèp Izrayèl la, se yon Bondye apa mwen ye. 8Seyè sèl Mèt la di ankò: -Wè pa wè, jou mwen t’ap pale a gen pou rive. Sa se sèten. 9Lè sa a, moun ki rete nan lavil peyi Izrayèl yo pral soti, yo pral ranmase dènye zam moun yo te kite, y’ap boule yo. Y’ap limen gwo boukan ak plak pwotèj yo, gwo kou piti, ak banza ak tout flèch yo, ak frenn yo, ak baton yo. Boukan an ap pran sètan pou l’ boule. 10Yo p’ap bezwen al chache bwa nan jaden pou fè dife, ni yo p’ap bezwen al koupe pyebwa nan rak, paske yo pral gen tout zam sa yo pou yo boule fè dife. Yo pral piye moun ki t’ap piye yo. Yo pral devalize moun ki t’ap devalize yo. Se Seyè sèl Mèt la ki di sa. 11Seyè di ankò: -Lè sa a, m’a bay Gòg yon kote nan peyi Izrayèl la pou yo antere l’. Se va Fon Vwayajè yo, sou bò solèy leve lòt bò lanmè Mouri a. Se la yo pral antere Gòg ansanm ak tout lame li a. Y’a rele l’ Fon lame Gòg la. 12Moun Izrayèl yo pral pran sèt mwa pou yo antere tout kadav yo, anvan pou peyi a nan kondisyon pou fè sèvis pou Bondye ankò. 13Tout moun nan peyi a pral mete men pou antere yo. Konsa tou, jou y’ap fè lwanj pou mwen an, y’a nonmen non yo tou. Se mwen menm, Seyè a, ki di sa. 14Apre sèt mwa sa yo, y’a chwazi gason pou vwayaje nan tout peyi a al chache kadav ki rete atè a pou yo antere yo. Se travay sa a ase y’a gen pou yo fè. Konsa, y’a mete peyi a nan kondisyon pou fè sèvis Bondye ankò. 15Nan vwayaj y’ap fè nan tout peyi a, chak fwa y’a jwenn yon zosman moun, y’a mete yon mak bò kote l’ pou kwòkmò yo ka vin pran l’ pou y’ al antere l’ nan Fon lame Gòg la. 16Va gen yon lavil toupre, y’a rele l’: Amona Fon lame a. Se konsa peyi a va nan kondisyon pou fè sèvis pou mwen ankò. 17Seyè sèl Mèt la di ankò: -Nonm o! Rele tout kalite zwezo ak tout kalite bèt nan bwa. Fè yo soti toupatou nan vwazinaj la pou yo sanble vin manje bèt mwen pare pou m’ touye pou yo a. Pral gen yon gwo fèt sou mòn Izrayèl yo, kote yo pral manje vyann, kote yo pral bwè san. 18Y’a manje vyann vanyan sòlda yo, y’a bwè san chèf latè yo. Moun sa yo, yo tankou belye mouton, ti mouton, bouk kabrit ak towo chatre byen gra peyi Bazan yo touye pou mwen. 19Lè m’a fin touye tout moun sa yo tankou lè y’ap fè ofrann bèt pou mwen, zwezo yo ak bèt nan bwa yo va manje grès vyann mezi yo kapab. Y’a bwè san jouk yo sou. 20Sou tab mwen an, y’a manje chwal, kavalye, sòlda ak moun k’ap fè lagè mezi yo kapab. Se mwen menm, Seyè sèl Mèt la, ki di sa. 21Seyè a di ankò: -M’ap fè nasyon yo wè gwo pouvwa mwen. M’ap moutre yo jan mwen konn pini lè m’a pini yo, y’a santi fòs ponyèt mwen lè y’a tonbe anba men m’. 22Depi lè sa a, jouk byen lontan apre sa, moun pèp Izrayèl yo va konnen se mwen menm Seyè a ki Bondye yo. 23Tout lòt nasyon yo va konnen se paske moun pèp Izrayèl yo pa t’ kenbe pawòl yo te gen avè m’ lan kifè yo te depòte yo. Se poutèt sa, mwen te vire do ba yo, mwen te lage yo nan men lènmi yo pou touye yo nan lagè. 24Mwen te ba yo sa yo te merite pou mechanste yo ak tout vye bagay derespektan yo te fè yo. Mwen vire do ba yo. 25Apre sa, Seyè sèl Mèt la di ankò: -Koulye a, mwen pral gen pitye pou pitit pitit Jakòb yo, pou pèp Izrayèl la. M’ap mete yo kanpe ankò. M’ap defann repitasyon non mwen an ki yon non apa. 26Lè y’a vin rete ankò nan peyi yo a san ankenn danje ni malè, san pesonn pou fè yo pè, y’a bliye jan moun te konn fè yo wont, jan yo pa t’ kenbe pawòl yo avè m’ pou y’ al fè sa ki mal. 27M’ap fè pèp mwen an soti nan mitan lòt nasyon yo pou yo tounen lakay yo. M’ap mache ranmase yo nan tout peyi kote lènmi yo ap viv. Lè m’a fè sa pou yo anpil nasyon va wè se yon Bondye apa mwen ye. 28Lè sa a, pèp mwen an va konnen se mwen menm, Seyè a, ki Bondye yo. Wi, mwen te fè depòte yo nan mitan lòt nasyon. Koulye a, m’ap ranmase yo, m’ap mete yo ansanm ankò nan peyi pa yo a, san mwen pa kite yonn dèyè. 29Mwen p’ap janm vire do ba yo ankò paske m’ap voye lespri m’ sou pèp Izrayèl la. Se Seyè sèl Mèt la ki di sa.

will be added

X\