Tito 2

1Ama nyi wune, moo nufu wusira yaseesi n sagi n pa yamonsi zu, 2a yeli dabkura, ni ba da kuuna, ka nyaara jilima, ka mari yam, ka niŋina Yeesu yeride nene, ka kpabira ba taaba, ka mari kenyiti. 3Lala n na pogkura gba, ba tira Naawunni jilima, ka da zuura niriba nyaana, ka da ti daam miina ba, ka wusira yasuma, 4a taasira pogsariba ba kpabira ba siriba ni biisi, 5ka baŋŋi ba maŋsi niŋi, ka da saamina ba siriba diisi, ka tumina nene ba yiyasi, ka niŋina yasuma, ka tira ba siriba jilima, niriba ba da nye daama togsi yabeeri ŋmeŋsira Naawun yela. 6Ka e lee n yeli bipola gba, ni ba baŋŋi ba maŋsi niŋi. 7E gba, yaseesi zaa e n niŋina, e yi niŋina yasuma, ba nye, ka e wusira, a ni yamonsi, a ni jilima, 8ka yetira yasuma ko, so ba ki tee n naa n zabira i. Lala n na vi ni gbaag e dindima, a kpali ba ki tee n togsi yabeeri ŋmeŋsi ti. 9Girunsi gba, yaseesi zaa ba n niŋina, ba tira ba yidaandima jilima, ka tumina seema n petira ba, ka da mari naŋgbanchee, 10ka da zuura, ama ba mari yeride ga. Lala n na yaso zaa ba n niŋina ni wusi maa, Naawunni so n moligira ti la wusigu n veela. 11Nyaasi, Naawunni pa tira niriba zaa barika, ba baŋŋi seema ba ni niŋi n nye moligirisim, 12ka o wusira ti, ti da lee n kpabira durinye yabeeri, a ni seesi zaa n bi petira Naawunni, ama ti baŋŋi ti maŋsi niŋi, ka niŋina yasuma, ka kpabira Naawun yela, a yi durinye ŋa puwa, 13a gutira ti moligira Yeesu Kristu, so n niŋi Naawunni o lee n ta. Lala ti kpabira, ka mari tama maa ti ni nye o daama. 14Wune Yeesu daa n ti kpi n ti ti, a ti moligi ti, a yi ti yabeeri niŋi, ti ti loobi n niŋi o gbagba nivusuma, a kpabira yasuma ga. 15Wusira yela ŋa zaa, ka duusira ba zuuri, ka kpaasira ba tuba, a ni e daama zaa. Ka da ti niso zaa nyaasi i jaga.

will be added

X\