Aroom 2

1Ya nyaasi. Ka ya so zaa zabira o todaana, a kpali o yabeeri zu, ka mi niŋina yabeeri maa gba, o yabeeri maa lee n ka gaafara. A kpali bo, ka o zabira o todaana la, o zabirini o gbagba. 2Ka ti baŋŋi maa, Naawunni ni di so zaa n niŋina yabeeri ŋa seriya, a ni yamonsi. 3A zu, nyi wune, ka e zabira e todaana la, ka mi niŋina lala, da feera maa, Naawunni ki di e seriya. 4A koo, halli ka e niŋina yabeeri, e fe maa, Naawunni ni zo i nimbaa, a kpali o bunye ni kenyiti la zu. Ama Naawunni tira niriba bunye, ba ti dee n saamiya. 5A zu, ka e mari naŋgbankpeemini, ka bi dee n saamiya, e taasira e gbagba tubiri darigirisim, a yi daboriguso Naawunni di n di so zaa seriya nene, 6a ti so zaa, a kpali seema o yaniŋisa n be la zu. 7Lala n na, seesi n naa kenyiti niŋina yasuma, a kpabira Alizaana, a ni o veelim, a ni o jilima, a ni o nyevuri, Naawunni ni ti ba nye nyevuriso n ka baasigu la. 8Ama seesi n zabira, ka bi paara yamonsi zu, ama yabeeri, ba ni nye tubiri darigirisim ga. 9Lala n na nisaala zaa n niŋina yabeeri ya n nye nam ni beerim ga. Juusi dima ni nye nam maa poin, ka baligusi ba mi nye. 10Ama seesi zaa n niŋina yasuma ba ni nye kpeesigu, a ni jilima, a ni niŋgbirimaasim. Juusi dima ni nye poin, ka baligusi ba mi nye. 11A kpali bo, Naawunni bi gamsira. 12Ya nyaasi. So zaa n bi baŋŋi Naawun zaaligusi, ka niŋina yabeeri, ba ni kpi, ama ba ki naa zaaligusi maa di ba seriya. Ama seesi zaa n baŋŋi zaaligusi maa, ka niŋina yabeeri, ba ni naa zaaligusi maa di ba seriya. 13A kpali bo, seesi n baŋŋi zaaligusi maa, ka bi niŋina a, ba ki loobi maa niseesi Naawunni n boona nivusuma la, ama seesi n niŋina a. 14A zu, baliguseesi n bi baŋŋi zaaligusi maa, ka niŋina seema zaaligusi maa n wusira, ba zaalini ba gbagba zaaligusi, 15ka ba yaniŋisa wusira maa ba sufusi kpabira seema zaaligusi maa n wusira maa, ka ba feri feera ni ku ba, koo, a moligi ba, 16a yi daboriguso Naawunni di n ti Yeesu Kristu di so zaa seriya la. Lala n na baarusumseesi ni wusira maa yetira. 17Ya nyaasi. Ka ya so zaa sagi n pa maa, o niŋini Juusi nira, a fe maa, Naawun zaaligusi ni ti o nye moligirisim, ka yetira maa, o kpabira Naawun yela, 18ka baŋŋi Naawun kiperi, a ni yaseesi n veela, a kpali o n baŋŋi zaaligusi maa zu, 19ka mari tama maa, o ni tee n wusi zoomisi soori, a tira seesi n ba ligu niŋi paaligu, 20koo, a wusira zolisi ni biisi yam, a kpali zaaligusi maa n wusira u baŋinisim, a ni yamonsi la zu. 21Lala n na o wusira ba, ama ka o bi paara o gbagba wusigu maa zu, lala veela? A koo, o yetira maa, ba da zuura, ka o gbagba zuura. 22Koo, o yetira maa, ba da kpabira taaba pogiba, koo siriba, ka ŋu wune niŋina n ŋa. Koo, o chisira buga, ka zuura bini, a yi buga diisi. 23Koo, o yetira maa, Naawun zaaligusi mari tono ga, ka bi paara a zu. Lala n na o bi tira Naawunni jilima. 24Ya Juusi dima, a kpali ya zu, baligusi togsi yabeeri ŋmeŋsira Naawunni, seema kusu zaa ba n daa n sebi n digili Naawun buku puu la. 25Ya nyaasi. Ka ya paara Naawun zaaligusi zu, yoya ŋmaabu mari tono. Ama ka ya bi paara a zu, yoya ŋmaabu ki tee n niŋi seŋ, o niŋini maa, ba bi ŋma yoya maa. 26Lala n na, ka niso zaa yoori n bi ŋma, ka o paara zaaligusi maa zu, o niŋini maa, o yoori n ŋma. 27A zu, seesi yoya n bi ŋma, ka paara zaaligusi maa zu, barima ni di seesi yoya n ŋma, ka baŋŋi zaaligusi maa, ka bi paara a zu la seriya. 28Ya nyaasi. Juusi dima nivudamta bi niŋi Juusi dima gbagba, ka saŋkariŋmaasi dima nivudamta bi niŋi Naawun niriba. 29Ama so n niŋi Juusi nira gbagba niŋini so n kpabira Naawun yela o sufu niŋi. Lala n na, niseesi n niŋi Naawun niriba, o bi niŋi maa, ba yoya n ŋma, ama a kpali ba n kpabira Naawun yela ba sufusi niŋi, a ni ba siisi la zu. Halli ka niriba bi tira ba jilima, Naawunni kpeesira ba.

will be added

X\