Aroom 11

1Ya nyaasi. Halli lala zaa, Naawunni na bi zagsi ti Juusi dima. M gbagba niŋini Juusi nira, a kpali bo, Ibrahim ni o yaŋŋu Benjami niŋi m yaadima, ka m baŋŋi maa, Naawunni na bi zagsi ti, halli kusu zaa o daa n baŋŋi seema Juusi dima n ya n niŋi. Ya nyaasi seema ba n daa n sebi Naawun chaame Alayija yela, a yi Naawun buku puwa, seema o n daa n suusira Naawunni tira Juusi dima, a yeli, 3M duuma, ba ku e chaamesi zaa, ka saami seelasi ba n kuura buŋkobiri tira i, ka m ko n che, ka ba kpabira ba ku ma. 4Ama Naawunni daa n yeli u, Niriba tusa ayapoin n che, ka tumina ma, ka na bi gba tiŋŋa maali bugso ba n boona Beewu la. 5Lala n na pimpariŋa, Naawunni ti ba seesi barika, a nyisi ba. 6O bi nyisi ba, a kpali ba yaniŋisa zu, ama o ti ba ni barika putoom. Lala n na barika tiibu bi niŋi yaniŋisa sanyoobu. 7N ŋa zu Juusi dima bi nye bunso ba n kpabira maa. Ba seesi Naawunni n nyisi la nye u, ama seesi n che loobi maa tikpiya. 8A maa seema kusu zaa ba n daa n sebi n digili, ni Naawunni daa n ti ba niŋi maa ba n gbisira, ba nufu a da nyaara, ba tuba a da wumina, a ti paa zinni. 9A ni seema kusu zaa naaba Dawuda n daa n yeli, ni cheli ba gbaa ba, a yi ba bindira ziya, a maa takpab n gbaagira, koo awuleso n beri, koo, ba li bogiri niŋi, a nye tubiri darigirisim. 10Ka ti ba nufusi zoomi, ba da lee n nyaara, ka da lee n mari kpeeŋu zaa. 11Halli Juusi dima n li la, ba ni lee n nyisigi. Ama a kpali ba yabeeri zu, baligusi nyeni moligirisim, ka n ŋa ti Juusi dima maa mari pubeerim. 12Lala n na, a kpali ba n bi paara yasuma zu, baligusi nye barika ga. A zu, ka ba ti paara yasuma zu, ti zaa ni nye barika ga, a paasi. 13Ya baligusi, Naawunni daa n tumi ma m ti wusira ya, ka m yi moo nufu tumina n ŋa, 14a koo m ni tee n ti m taaba Juusi dima mari pubeerim, a loobi n nye moligirisim. 15Pimpariŋa ba zagsigu maa ti baligusi zaa nye daama ba ni Naawunni loobi naŋgbanluŋko. Ama ka Juusi dima ti loobi n paara, o ni niŋi maa nyevuri, a yi kum puwa. 16Ya nyaasi. Ka bunso piiligu niŋi Naawun toori, o zaa niŋini o toori. Koo, ka tii nyaga niŋi Naawun toori, o wula zaa niŋini o toori. 17Ama ka o wuliseesi kabi, ka ba naa moo puu tii wula, a ŋma n tabi tii maa, moo puu tii wula maa ni lee n bosi nene, ka nye tii maa kpeeŋu. Ya baligusi niŋini maa wuliseesi ba n ŋma n tabi la. 18A zu, ya da kpalimina, a yi wuliseesi n kabi la saani. Ama ka ya zagsi, ka kpalimina, ya teesi maa, nyaga n tira wula kpeeŋu, ka wula bi tira nyaga kpeeŋu. 19Ama ya ni yeli maa, ba kabini wula maa, ba ti ŋma wulipaala tabi la. 20Yamonsi n na. Ama seesi ba n kabi la niŋini maa Juusi dimseesi n bi niŋina Yeesu yeride, ka ya ba niŋi, a kpali ya yeride niŋinisim la zu. A zu, ya da kpalimina, ama ya zora dabeem. 21A kpali bo, seema Naawunni n ti ba kabi tii maa wula gbagba la, lala n na o ni tee n kabi wuliseesi ba n ŋma n tabi la basi. 22A zu, ya nye seema Naawunni n zora nimbaa, a ni seema o n darigira tuba. Seesi zaa n li, o darigira ba tuba. Ka seesi zaa n paara o zu, o zora ba nimbaa. Ama ka ba zagsira n ŋa, o ni kabi ba basi. 23Ama Juusi dimseesi n piili n kabi la, ka ba ti loobi n niŋina Yeesu yeride, ba ni lee n naa ba tabi tii maa, a kpali bo, Naawunni ni tee n niŋi n ŋa. 24A kpali bo, ka ba ni tee n ŋma moo puu tiisi wula tabi tiyindaana, seema niriba n niŋina, ti baŋŋi maa, ba ni lee n tee n naa tii maa wula gbagba, a ŋma n tabi tii maa. 25M taaba, m kpabira ya baŋŋi Juusi dima yela ŋa, ya da feera maa, ya mari yam gaari ba. Ama ba mari tubikpeeŋu, a ti paa jemanso baliguseesi Naawunni n nyisi la zaa n kpe o naalim puwa. 26Lala n na Juusi dima zaa ni nye moligirisim, seema kusu zaa ba n daa n sebi n digili, ni moligira maa ni yi Jiruusilim tiŋŋa puwa, a wa ti nyisi yabeeri zaa, a yi Juusi dima puwa. 27A jemani maa mani Naawunni ni che ba yabeeri paŋŋi ba, seema kusu zaa ni daa n ti noori la. 28Ya nyaasi. Juusi dima zagsini Yeesu baarusuma maa wuminisim, a zu, ba niŋini Naawun dindima, ya baligusi ya nye moligirisim. Ama kusu zaa Naawunni daa n nyisini ba yaadima, a ni ba baligu zaa, a zu, o kpabira ba. 29A kpali bo, Naawunni ki zagsi seesi o n nyisi, ka ti ba barika la. 30Ya lee n nyaasi. Ya baligusi, ya daa n bi paara Naawun zu, ama pimpariŋa Naawunni zo ya nimbaa, a kpali bo, Juusi dima zagsini o zu paarisim. 31Ama Juusi dima maa, a kpali ba n bi paara Naawun zu la, o ni tee n zo ba nimbaa, seema o n zo ya nimbaa la. 32Lala n na, Naawunni ti niso zaa ba baŋŋi maa, ba niŋina yabeeri, o ti nye daama zora ba nimbaa. 33Ya nyaasi. Naawun yela, a ni o yam, a ni o baŋinisim zooya ga. So zaa ki tee n baŋŋi bunso zu o n niŋina yela, a ni seema o n niŋina a. 34A maa seema kusu zaa ba n daa n sebi n digili, ni so zaa bi baŋŋi ti duuma feri feera, koo, a wusira u yam. 35Koo, so zaa bi ti u seŋ, o ti nye sanyoobu. 36A kpali bo, wune n daa n maali bunso zaa, ka o zu n na bunso zaa mi ba niŋi, ka a zaa niŋi o toori. A zu, cheli so zaa ba kpeesira u, a wara saŋa ni saŋa zaa.

will be added

X\