Aroom 1

1Ya Naawun nyaaŋpaariba n ba Aroom tiŋŋa puwa, mani Pool puusira ya. M niŋini maa Yeesu Kristu giruŋŋu, o tumi ma, m wa ti wusira Naawun baarusuma, 2seema kusu zaa o n daa n ti noori, ka ti o chaamesi togsi a yela, ba sebi a digili Naawun buku puu la. 3Baarusuma maa niŋini o bii Yeesu Kristu yela, so n daa n niŋi naaba Dawuda yaŋŋu durinye puu la, 4ama Naawun saani, a kpali o n nyisigini kum puu la zu, ti baŋiya maa, o niŋini Naawun biya, a ni daama, ka ti mi boona u ti duuma Yeesu Kristu. 5O zu Naawunni daa n ti ti barika, ka tumi ti ti gaari baligusi paaligusi zaa, ti ti niriba niŋina Yeesu Kristu yeride, ka paara o zu nene. 6Yarima n niŋi ba seesi, ka Yeesu Kristu daa n nyisi ya, ya loobi o toori. 7A zu n na ti puusira ya Aroom dimseesi Naawunni n kpabira, ka nyisi, ya loobi o toori la. Ti ba Naawunni, a ni ti duuma Yeesu Kristu ti ya barika, a ni niŋgbirimaasim. 8Ya nyaasi, m kpeesira Naawunni, a yi Yeesu Kristu niŋi, a tira ya zaa, a kpali bo, seela zaa dima wumina seema ya n niŋina Yeesu yeride. 9M gba mi tumina Naawunni, a ni m sii zaa, a wusira o bii Yeesu Kristu baarusuma. Ka wune Naawunni niŋini m dansiya, ni ka m togsira o saani, m yi yetira ya yela, 10a suusira u maa, dindaso o ni ti ma daama m ta ya saani. 11M kpabira m niŋi n ŋa, a ti wusi ya Naawun sii daama yela, a moligira ya, 12m ni ya zaa ti duusira taaba zuuri, ti zaa ti niŋina Yeesu yeride nene. 13M taaba, m kpabira ya baŋŋi maa m daa n yi kpabira m ta ya saani, m ti nye tono, a yi ya puwa, a ni baligusi zaa puwa. A kpali bo, o tiri ma ga m moligira niriba zaa, halli Giriiki dima ni saamba, koo yambaŋiniba ni zolisi. A zu n na ma kpabira m ta ya Aroom dima gba saani, a ti wusira ya Yeesu baarusuma. Ama m na bi nye daama. 16Ya nyaasi. Yeesu baarusuma wusigu maa bi ti ma mari vi. A kpali bo, a niŋini Naawun daama moligira niseesi zaa n niŋina Yeesu yeride, halli, a yi o piiligu, Juusi dima, a ni pimpariŋa baligusi zaa. 17Ka Naawunni ti niriba baŋŋi maa, yeride niŋinisim maa koluŋko ni loobi ba nivusuma, seema kusu zaa ba n daa n sebi n digili, ni so n loobi nivusuŋŋu, a kpali o yeride niŋinisim la zu, wune ni nye nyevuri. 18Ya nyaasi. Ti baŋiya maa, Naawunni, so n ba Alizaana puu la ni darigi yabeniŋiniba zaa tuba, a kpali seema ba n niŋina yabeeri la, ka bi paara yamonsi zu. 19O ni niŋi n ŋa, a kpali bo, wune Naawunni tee n wusi niriba o gbagba yela, yabeniŋiniba maa baŋŋi maa, ba n di n tee n deeg a, ama ka zagsi. 20Ya lee n nyaasi. A yi durinye ŋa zaa piiligu, niriba daa n baŋŋi Naawun yela, a kpali yaseesi zaa o n daa n maali maa. Lala n na, halli niriba daa n ki tee n nye u, ba baŋŋi maa, o niŋini Naawunni, ka mari daama ga, a wara saŋa ni saŋa zaa. A zu, yabeniŋiniba ka gaafara zaa. 21A kpali bo, halli ba baŋŋi Naawunni maa, ba bi tira u jilima, koo, a kpeesira u. Ama ba feera zoltiri, ka lee n ka yam. 22Ba yetira maa, ba mari yam, ka loobi zolisi, 23a maana wuna, seesi ba gbagba n me, a maa nisaaldima, koo niinsi, koo buŋkobiri, koo waagi, ka bi tumina Naawunni, so n mari daama ga, a wara saŋa ni saŋa zaa la. 24Lala n na ba zagsi Naawun yela n niŋi yamonsi, ka paara jiri, a maana wuna, ka bi tumina wune Naawunni, so n daa n maali bunso zaa. A zu, wune Naawunni, so n mari daama ga, a wara saŋa ni saŋa zaa la zagsi ba, ba niŋina seema ba sufusi n kpabira, a niŋina yabeeri, a yi seema dabsi ni pogiba n doora. 26Lala n na, Naawunni zagsi ba, ba niŋina yabeeri. Halli pogseesi bi lee n kpabira ba doora ba siriba saani, ka doora taaba saani, 27ka dabseesi gba mi niŋina n ŋa. Ba yabeeri maa zooya, ka ti ba nye nam, a yi ba niŋasi niŋi. 28Lala n na, a kpali ba n bi kpabira ba paara Naawun zu la, o ti ba paara ba gbagba feribeeri zu, ka niŋina yabeeri ga, a mari pubeerim, koo halibee, koo, a zabira ŋuuri, koo, a kuura, koo, a zabira, koo, a yomsira, koo, a zuura taaba nyaana, 30koo, a tuura taaba, koo, a chisira Naawunni, koo, a mari yakara, koo, a poo, koo, a kpalimina, koo, a feera seema ba n ya n niŋi yabeeri paasira, koo, a zagsira ba niriba noya, 31koo, a zoligi, koo, a ka yamonsi, koo, a bi kpabira taaba, koo, a bi zora taaba nimbaa. 32Ba baŋŋi maa, Naawunni daa n yeli, ni niseesi n niŋina n ŋa, o daga ba n ku ba, ama ba niŋina yela ŋa, ka mi sagi n paara seesi n niŋina n ŋa zu.

will be added

X\