Soosa zu yela 19

1N ŋa n ti baasi, ma wumi zamutintaa goosi, a yi Alizaana n tasi n yetira, Ya cheli ti kpeesira Naawunni, a kpali bo, o mari daama ga, ka o yuuri du, ka o moligira ti, 2ka dira seriya ni yamonsi, ka jagimilu maa n naag o yabeeri saami durinye puu la o di o seriya, a darigi o tubiri, a kpali seema o n daa n kuura wune Naawunni tumtuminiba la zu. 3Ka ba lee n tasi n yeli, Ya cheli ti kpeesira Naawunni, jagimilu maa bugum wusi duura, a wara saŋa ni saŋa zaa. 4Niŋi n na, kpemba pisiyi ni banaasi maa, a ni buŋkobiri anaasi maa li tiŋŋa kpeesira Naawunni n zi naalim kogu maa niŋi, ka yetira, Yamonsi, ya cheli ti kpeesira Naawunni. 5Ka a yi naalim kogu maa niŋi goo tasi n yeli, Ya Naawun tumtuminiba n zora u dabeem, halli nivukara, a ni biisi, ya cheli ti kpeesira ti ba Naawunni. 6Ka ma lee n wumi goosi, a maa zamutintaa goosi, koo koom n paali n zora, koo saa n tasira, ba yeli, Ya cheli ti kpeesira ti duuma Naawunni kpeeŋudaana n di naalim, ka nyaasira ti, 7ka ti puusi a peligi, ka ti o yuuri o du, a kpali bo, jemani paaya, pebila maa o naag o poga, ka poga maa mi niŋi siriya, 8ka ba ti o pili bimpeelisuma. Ya nyaasi, binsuma maa n niŋi yasumseesi Naawun nivusuma n daa n niŋina. 9Niŋi n na, malaki maa yeli ma, Sebi n digili, ni seesi ba n booli ba ti di, a kpali pebila maa n naag o poga maa la zu, ni nye barika. Ka o lee n yeli ma, ni yela ŋa niŋini Naawun yamonsi. 10Niŋi n na, ma li o noba niŋi, a ti kpeesira u, ka o yeli ma, Da niŋina n ŋa, a kpali bo, m ni ni ni e taaba zaa dee Yeesu yela tumina Naawunni. Ama kpeesira Naawunni. Nyaasi, seesi n wusira Yeesu yela niŋini Naawun chaamesi. 11Niŋi n na, ma nye saazu n yoo, ka bunduurigupeeli yi, ka so n ba u maa ba boona u Yamonsi, a ni so n ka zagsigu, ka o dira seriya nene, ka zabira toowa, a ni yamonsi. 12O nufu ŋmaani bugum zulimini, ka o zu mari nadima suga zupilisi, ka ba sebi yuuri digili u, o ko n baŋŋi o gbinni, 13ka o kpariga zaa si zeem, ka o yuuri di Naawun yela. 14Ka Alizaana toozabiriba n pili bimpeelisuma, a ni ba bunduurigupeela, paara o zu. 15Ka a yi o naŋgbanni, sudirigu ba niŋi, so o ya n naa n zabi baligusi, ka di ba naam, ka nyaasira ba kpeeŋtiri, ka darigira tubiri ga, seema Naawunni kpeeŋudaana n ti o niŋina. 16Ka a yi o kpiiligu ni o kpariga niŋi, ba sebi n digili, nadima zaa naaba, a ni duumasi zaa duuma. 17Niŋi n na, ma nye malaki n za wuluŋu niŋi, ka o tasi n yeli niinsi zaa n yigira saazu, Ya ti laŋsi n di Naawun bindira. A zooya, 18ka niŋi nadima ni toozabiriba kpemba valisi, a ni bunduurigusi ni seesi n ba a valisi, a ni niriba zaa, halli girunsi ni seesi n bi niŋi girunsi, koo nivukara ni biisi zaa valisi. 19Ka ma lee n nye buŋkobee maa, a ni durinye nadima, a ni ba toozabiriba n laŋsi, ba ti zabi so n ba bunduurigu maa ni o toozabiriba la, 20ka ba gbaa buŋkobee maa a ni chaame jiriŋmaara la. Wune n niŋi buŋkobee ayidaana, ka daa n niŋina mamaachi yela, a yi buŋkobee piiligudaana maa nufu niŋi, a yomsira seesi ba n naa buŋkobee maa namba sebi n digili la, a ni seesi n daa n kpeesira bunso n ŋmaani buŋkobee maa la. Ba n gbaa ba la, ba naa ba lobi n niŋi bugum ni kugituula niŋi, 21ka so n ba bunduurigu maa, ka suu yi o naŋgbanni la naa suu maa ku seesi n che, ka niinsi maa zaa di ba valisi maa piri.

will be added

X\